Tuesday, November 27, 2012

இந்திய மக்கள் யுத்தத்தை ஆதரிக்கும் சர்வதேச மகாநாடு, ஜெர்மனி

ES LEBE DER VOLKSKRIEG IN INDIEN! 
(இந்திய மக்கள் யுத்தம் வாழ்க!)


இந்தியாவில் நடந்து கொண்டிருக்கும், மாவோயிஸ்டுகளின்  மக்கள் யுத்தத்திற்கு, சர்வதேச ஆதரவை திரட்டும் நோக்குடன், 24.11.2012, ஜெர்மனி, ஹம்பூர்க் நகரில் ஒரு மகாநாடு நடைபெற்றது. பல உலக நாடுகளில் இருந்தும், 300 க்கும் அதிகமான பார்வையாளர்கள் மகாநாட்டில் கலந்து கொண்டனர். ஐரோப்பிய நாடுகளில் இருந்து மட்டுமல்லாது, பிரேசில், பேரு, அமெரிக்கா, கனடா, ஆப்கானிஸ்தான், பிலிப்பைன்ஸ், எத்தியோப்பியா போன்ற பல நாடுகளில் இருந்தும் பேராளர்கள் வந்து கலந்து கொண்டு, மக்கள் யுத்தத்திற்கு தமது ஆதரவை தெரிவித்தனர். 

ஜெர்மனியில், ஹம்பூர்க் நகரில் பாட்டாளிவர்க்க கட்சிகள் பலமாக உள்ளன. வட ஐரோப்பாவில், மிகப் பெரிய துறைமுகத்தை கொண்டிருக்கும் ஹம்பூர்க் நகரம், முதலாம் உலகப்போரின் முடிவில் ஒரு பாட்டாளி வர்க்கப் புரட்சியை சந்தித்திருந்தது. தொழிலாளர்கள் புரட்சி மூலம் அதிகாரத்தை கைப்பற்றி, அமைக்கப்பட்ட சோவியத் அரசு, குறைந்தது ஒரு மாதமாகிலும் இயங்கிக் கொண்டிருந்தது. இன்றைய ஹம்பூர்க் நகரிலும், இந்திய மக்கள் யுத்தத்திற்கு ஆதரவு தெரிவிக்கும் வாசகங்கள், நகரின் பல இடங்களில் சுவரோவியங்களாக தீட்டப் பட்டுள்ளன. நவம்பர் 2012 நடந்த மகாநாட்டை, ஜெர்மன், மற்றும் புலம்பெயர்ந்த துருக்கி மாவோயிஸ்டுகள் ஒழுங்கு படுத்தி இருந்தனர். 
  • மகாநாட்டை ஒருங்கிணைத்ததில், இத்தாலி கம்யூனிஸ்ட் கட்சி ஒன்றும் முக்கிய பங்காற்றி உள்ளது. இத்தாலியில் இருந்து ஒரு பெரிய குழு மகாநாட்டில் கலந்து கொண்டிருந்தது.  இத்தாலியின் மாவோயிஸ்ட் கம்யூனிஸ்ட் கட்சியின் (PCM) பேராளர், மகாநாட்டை ஆரம்பித்து வைத்தார். இதுவரை காலமும் மக்கள் யுத்தத்தில் இறந்த போராளிகளுக்கும், மக்களுக்கும் வீர வணக்கம் செலுத்தப் பட்டது. மகாநாட்டில் கலந்து கொண்டவர்களின் உரைகள், உடனுக்குடன் மொழிபெயர்த்து வழங்கப் பட்டன. ஜெர்மன், ஆங்கிலம், ஸ்பானிஷ், இத்தாலி, துருக்கி மொழிபெயர்ப்பாளர்கள் சுறுசுறுப்பாக இயங்கிக் கொண்டிருந்தனர். அடுத்து உரையாற்றிய, துருக்கி கம்யூனிஸ்ட் கட்சி (மார்க்சிஸ்ட்-லெனினிஸ்ட்) (TKP - M/L) உறுப்பினர், இந்தியாவில் நக்சலைட் இயக்கத்தின் தோற்றம், வளர்ச்சி, களப்பலியான தலைவர்கள், இந்திய அரச அடக்குமுறைகள் ஆகிய விபரங்களை கொண்ட வரலாற்றை தொகுத்து தந்தார். 
  • துருக்கி/வட-குர்திஸ்தான் கம்யூனிஸ்ட் கட்சியை சேர்ந்த பேராளர், கம்யூனிஸ்ட் இயக்கங்களின் ஒற்றுமை குறித்தும், நேபாள கம்யூனிஸ்ட் கட்சி வர்க்கப் போராட்டத்தை முன்னெடுக்க வேண்டிய அவசியம் குறித்தும் பேசினார். "இந்தியாவில் மக்கள் யுத்தம் பல குழுக்களால் நடத்தப் படுகின்றது. மக்களின் எஜமானர்களான உழைக்கும் வர்க்கம், பெண்கள் ஆகியோரின் பங்களிப்பு அதிகரித்துள்ளது.  மற்ற நாடுகளில் உள்ள கம்யூனிஸ்டுகள், இந்திய மக்கள் யுத்தத்தை, தமது போராக கருத வேண்டும். நடைமுறைச் சாத்தியமான அரசியல் வேலைத்திட்டம் குறித்து ஆராய வேண்டும்." என்று கூறினார். 
  • பிரேசில் கம்யூனிஸ்ட் கட்சி பிரதிநிதியின் உரையில் இருந்து: "மக்கள் யுத்தத்தில் வீர மரணமடைந்த கிஷன்ஜியை நினைவுகூரும் அதே வேளை, ஆப்கானிஸ்தான், துருக்கி, பிரேசில் ஆகிய நாடுகளில் மக்களுக்காக போராடி மரித்த வீரர்களையும் நினைவுகூறுவோம். தியாயங்கள் இல்லாமல் போராட்டம் முன்செல்வதில்லை.  இந்திய மக்கள் யுத்தத்தை ஆதரிக்கும் ஆயிரக் கணக்கான சுவரொட்டிகளை பிரேசில் முழுவதும் ஒட்டினோம். அருந்ததிராயின் "தோழர்களுடன் நடைப்பயணம்"  நூலை போர்த்துகீசிய மொழியில் மொழிபெயர்த்து விநியோகித்தோம். ஏகாதிபத்தியத்திற்கு எதிராக மக்கள் கிளர்ந்தெழுவது, அவர்களது உரிமை. நாடளாவிய பிரேசில் கம்யூனிஸ்ட் கட்சியை ஸ்தாபிக்கவும், மக்கள் யுத்தத்தை முன்னெடுக்கவும் இருக்கிறோம். மக்கள் யுத்தம் சாத்தியமில்லை என்று மறுப்பதானது, திரிபுவாதிகள் ஒளிந்து கொள்ள இடமளிப்பதாகும்." என்று தனது உரையில் தெரிவித்தார். பேரு நாட்டில் மக்கள் யுத்தத்தை நடத்தி, தற்பொழுது சிறையிலிருக்கும் ஒளிரும்பாதை ஸ்தாபகர் கொன்சலோவை நினைவு கூர்ந்த பொழுது, மண்டபம் நிறைந்த கரகோஷம் எழுந்தது. 
  • பிலிப்பைன்ஸ் கம்யூனிஸ்ட் கட்சியான, NDF  சார்பில் பேசிய பேராளர், இந்தியாவின் அவல நிலை பற்றி புள்ளிவிபரங்களுடன் விளக்கினார். இந்தியாவில் வாழும் 90% மான மக்களுக்கு, அது ஒரு நரகமாகவே இருக்கின்றது. இரண்டு மில்லியன் குழந்தைகள் போஷாக்கின்றி இறக்கின்றன. இந்திய மக்கள், ஒரு புதிய ஜனநாயகப் புரட்சியை நோக்கி முன்னேறிக் கொண்டிருக்கின்றனர், என்று அவர் தனது உரையில் தெரிவித்தார். அவரை அடுத்து பேசிய, ஆப்கானிஸ்தான் மாவோயிஸ்ட் கம்யூனிஸ்ட் கட்சி உறுப்பினர், இந்திய போலிஸ், இராணுவப் படைகளுக்கு இஸ்ரேலின் மொசாட் பயிற்சி அளிக்கின்றது. அடக்குமுறையாளர்கள் சர்வதேச ரீதியாக ஒன்றிணையும் பொழுது, சர்வதேச பாட்டாளி வர்க்கம் ஒன்று சேர வேண்டிய அவசியத்தை வலியுறுத்தினார். இந்திய கம்யூனிஸ்ட் கட்சி (நக்சல்பாரி) அனுப்பிய அறிக்கை ஒன்றும், மகாநாட்டில் வாசிக்கப் பட்டது. 
  • கனடா புரட்சிகர கம்யூனிஸ்ட் கட்சியை சேர்ந்த பிரதிநிதி உரையாற்றும் பொழுது: "மக்கள் யுத்தம் இந்திய அரசை ஆட்டம் காண வைத்துள்ளது. இந்தியாவின் பல பகுதிகளில் செங்கொடி ஏற்றப் பட்டுள்ளது. இந்திய அரசின் கொடூரமான அடக்குமுறைக்கு எதிர்ப்பு தோன்றவே செய்யும். சர்வதேச நாடுகளில், தோழமை உணர்வை காட்டும் நடவடிக்கைகள் நடைபெறுகின்றன. இந்திய அரசின் காட்டு வேட்டை இராணுவ நடவடிக்கையை நிறுத்தக் கோரும் பிரச்சாரங்கள் முன்னெடுக்கப்படும்." என்று தெரிவித்தார். அவரை அடுத்து பேசிய பிரெஞ்சு மாவோயிஸ்ட் கட்சியொன்றின் பிரதிநிதி, பிரான்ஸ் நாட்டில் பல கலந்துரையாடல்களை நடத்தியதாகவும், ஒரு தடவை, தமிழ் நாட்டில் திறக்கவிருந்த பிரெஞ்சு பன்னாட்டு நிறுவனம் ஒன்றிற்கு எதிராக ஆர்ப்பாட்டம் செய்ததாகவும் தெரிவித்தார். 
  • ஆஸ்திரியா நாட்டில், "புரட்சிகர கட்டுமான இயக்க" பிரதிநிதியின் உரையில் இருந்து: "இவ்வருட செப்டம்பர் மாதம் வியனாவில் எமது இயக்கம் ஆரம்பிக்கப்பட்டது. ஏகாதிபத்திய எதிர்ப்பு நடவடிக்கையின் ஓரங்கமாக, துண்டுப்பிரசுரங்கள் விநியோகிக்கப் பட்டன. கையெழுத்து வேட்டை நடத்தப் பட்டது. இந்திய தூதுவராலயம் முன்பு ஆர்ப்பாட்டம் நடத்தப் பட்டது. இரண்டு ஆஸ்திரிய தினசரிகளில், இந்திய மாவோயிஸ்டுகளின் பிரகடனங்கள் பிரசுரமாகின. விடுதலைக்கான போராட்டம் சர்வதேச மயமாகியுள்ளது. கடந்த காலத்துடன் ஒப்பிடும் பொழுது, ஆஸ்திரிய மக்களின் ஆதரவு அதிகரித்துள்ளது." 
  • பிரிட்டனில் இருந்து வந்து உரையாற்றிய பேராளர், தான் மட்டுமே இந்த மகாநாட்டிற்கு பிரிட்டனில் இருந்து வந்து கலந்து கொள்வதாகவும், அந்த நிலைமை மாற வேண்டும் எனவும் தெரிவித்தார். குறிப்பாக, இந்தியாவுடன்  200 வருட கால நெருங்கிய உறவைக் கொண்டுள்ள பிரிட்டனில் தான், மக்கள் யுத்தத்திற்கு ஆதரவான இயக்கம் முழுவீச்சுடன் செயற்பட்டிருக்க வேண்டும். கடந்த வருடம், லண்டனில் அருந்ததிராய் கலந்து கொண்ட பொதுக்கூட்டம் ஒன்று நடைபெற்றது. அதற்குப் பிறகு எந்த வித செயற்பாடும் இல்லை. ஆப்கானிஸ்தானில் ஆக்கிரமித்திருக்கும் பிரிட்டிஷ் படையினரை, பிரிட்டனில் வீரர்கள் என்று புகழ்கிறார்கள். ஆக்கிரமிப்புப் படையை எதிர்த்துப் போராடும் ஆப்கானிய விவசாயிகளே உண்மையான வீரர்கள். (பார்வையாளர்கள் மத்தியில் இருந்து பலத்த கைதட்டல்) ஒரு முறை, சீனா சென்று மாவோவை சந்தித்த மேற்கத்திய நாடொன்றின் உதவி நிறுவனத்தின் பிரதிநிதி கேட்டார்:"நாங்கள் உங்கள் நாட்டிற்கு என்ன உதவி செய்ய வேண்டும்?" அதற்கு பதிலளித்த மாவோ: "உங்களது தாயகத்திற்கு திரும்பிச் செல்லுங்கள். அங்கே ஒரு புரட்சியை ஏற்படுத்துங்கள். அதுவே நீங்கள் செய்யும் மிகப்பெரிய உதவி." என்றார். (மண்டபத்தில் எழுந்த கரகோஷம் அடங்க பல நிமிடங்கள் எடுத்தன.) 
  • ஸ்பெயின் நாட்டில் தன்னாட்சிப் பிராந்தியமான, கலீசியா வை சேர்ந்த மாவோயிஸ்ட் கட்சியின் பிரதிநிதி, பொருளாதார நெருக்கடியினால் பாதிக்கப்பட்ட ஸ்பானிஷ் மக்களின் போராட்டத்திற்கு, இந்திய மக்கள் யுத்தம் உந்து சக்தியாக இருப்பதாக தெரிவித்தார்.  இந்திய ஆதரவுக் கழகத்தை சேர்ந்த சுவீடிஷ் தோழர்கள், "தண்டகாரண்யா" என்ற பாடலை சுவீடிஷ் மொழியில் பாடினார்கள். மகாநாட்டின் நடுவில் இடம்பெற்ற புரட்சிகர இசை நிகழ்ச்சிகள் பார்வையாளர்களை உற்சாகப் படுத்தின. ஜேர்மனிய இளங்கலைஞர் ஒருவர், இந்தியப் புரட்சியில் ஈடுபட்டுள்ள மக்களுக்கு ஆதரவு தெரிவித்தும், மகாநாட்டிற்கு வாழ்த்துக் கூறும் வகையிலும் ராப் இசையமைத்து பாடினார். துருக்கி இசைக் குழுவினர், துருக்கி மொழியில் அமைந்த புரட்சிகரப் பாடல்களைப் பாடினார்கள். இத்தாலியில் பாசிசத்தை எதிர்த்து போராடிய கம்யூனிசக் கெரில்லாக்களின் உலகப் புகழ் பெற்ற "பெல்லா ச்சாவ்" பாடலை, துருக்கி மொழியில் பாடினார்கள். அந்தப் பாடலை, பார்வையாளர்களும் கரவொலி எழுப்பி சேர்ந்து பாடினார்கள். 

  • "புரட்சி வெல்க!", "மக்கள் யுத்தம் ஓங்குக!", "சர்வதேச மக்களின் ஒன்றிணைந்த போராட்டம்!" என்பன போன்ற கோஷங்கள் எழுப்பப் பட்டன.









_______________________________________________________________________

Press release from the Conference


Internationalist gathers in Hamburg in Support of the People’s War in India
On the 24th of November the International Conference in Support of the People`s War in India took place in the city of Hamburg, Germany. Following the joint Call of the International Committee to Support of the People`s War in India and the Hamburg based League against Imperialist Aggression, internationalists form different parts of the world came together to exchange views on who to develop the international work in support of the struggle of the Indian people against imperialism, semi-feudalism and bureaucratic capitalism. Delegations, organizations and individuals from Afghanistan, Austria, Brazil, Canada, Columbia, France, Germany, Holland, Iran, Italy, Kurdistan, Norway, Palestine, Peru, Philippines, Spain, Sri Lanka, Sweden, Switzerland, Turkey, the United Kingdom and many other countries participated in the Conference. Some 300 hundred persons attended the event.
Communist Parties, revolutionary mass-organizations, revolutionary youth organizations and solidarity and anti-imperialist organizations from all corners of the world made statements of support to the Indian comrades. From many countries from where comrades and friends of the Indian Maoists were not able to attend with a delegation sent messages of support. A list of the participating Parties and Organizations and all the speeches and messages will be published in the upcoming days on the website of the Conference: www.indienkonferenz.tk
On the same webpage pictures from the Conference as well as information of the preparatory campaign – including the official video of mobilization, the graffiti paintings, posters and so forth – can be seen.
The Conference also contained a cultural program with music groups preformed Swedish folk music, German Rap and Revolutionary songs in Turkish, all in a profound anti-imperialist spirit.
An important statement was made by a Palestinian comrade, who pointed out who the struggle of the Indian people are linked to the resistance against the murderous Zionist Occupiers and their Yankee-imperialist masters. At the end of the speak slogans in support of the heroic Palestinian people resounded the hall. The organizers of the Conference stated a strong condemnation of the barbaric attacks on the population of Gaza.
Another important feature of the Conference was the great number of youth who participated, not only as participants but also as part of the organizing structures. This aspect, together with the truly internationalist character of the event, gave it a very vivid and dynamic character.
After the official part of the program delegates and participants continued to celebrate and long into the night revolutionary songs in many different languages and anti-imperialist, militant antifascist and communist slogans made the tune of a rejoicing feast of internationalism.
As a result of the Conference concrete steps have been made in the Coordination of the forces who support the People`s War in India. This without a doubt will have very real impact on the international work and lead to a stronger international campaign.
When we wrote the Call to the Conference we stated that we wanted it to be a vivid expression of proletarian internationalism. It was. Form the Hamburg Conference sounds a cry that says:
We stand with our comrades in India!
Victory to the People`s War!
International Committee to Support the People`s War in India
League against Imperialist Aggression (Hamburg, Germany)
26th November 2012

Friday, November 23, 2012

சியோனிசத்தின் கதை : இஸ்ரேலின் வரலாறு பற்றிய ஆவணப்படம்

பாலஸ்தீனம், துருக்கி ஓட்டோமான் சாம்ராஜ்யத்தில் இருந்து கைப்பற்றப் பட்டு, பிரிட்டிஷ் காலனியாதிக்கவாதிகளினால் பாதுகாக்கப் பட்ட பிரதேசமான பின்னர் தான், நவீன இஸ்ரேலின் வரலாறு ஆரம்பமாகின்றது. அதற்கு முன்னர், பாலஸ்தீனத்தில் வாழ்ந்த யூதர்களும், முஸ்லிம்களும் எந்த வித பகையுணர்ச்சியும் இன்றி,  அன்னியோன்னியமாக அருகருகே வாழ்ந்து வந்தனர். ஐரோப்பாவில் ஸ்தாபிக்கப் பட்ட சியோனிச இயக்கம், பாலஸ்தீனத்தில் நிலம் வாங்கி யூத குடியேற்றங்களை அமைத்தது. யூத குடியேற்றங்களில் இரகசிய ஆயுதக்குழுக்கள் இயங்குவதை பொறுத்துக் கொண்ட பிரிட்டிஷ் ஆட்சியாளர்கள். யூத பயங்கரவாத குழுக்களினால் நடத்தப்பட்ட, பிரிட்டிஷ் காலனிய ஆட்சியாளர்களுக்கும், அரபு மக்களுக்கும் எதிரான பயங்கரவாத தாக்குதல்கள். யூதர்கள் சிறுபான்மையினராக இருந்த போதிலும், இஸ்ரேல், பாலஸ்தீனம் என்ற இரு தேசங்களை உருவாக்க ஒப்புதல் வழங்கிய ஐ.நா. மன்றம். ஆயுத பலம் மிக்க யூத படைகளினால் முறியடிக்கப்பட்ட, ஒருங்கிணைப்பில்லாத அரபு நாடுகளின் படையெடுப்பு. பாலஸ்தீன நிலங்களை ஆக்கிரமிப்பதற்காக நடத்தப்பட்ட இனச் சுத்திகரிப்பு. பிரிட்டிஷ் காலனிய ஆட்சியாளர்களின் அடக்குமுறை தந்திரங்களை பிரயோகிக்கும் இஸ்ரேலிய இராணுவம். இஸ்ரேலிய ஆக்கிரமிப்புப் படைகளுக்கு எதிரான, பாலஸ்தீன மக்களின் எழுச்சி. இவை போன்ற வரலாற்றுத் தகவல்களை காட்சிப்படுத்த, பழைய படச் சுருள்களை தொகுத்து ஒரு முழுமையான ஆவணப் படத்தை தயாரித்துள்ளார் Ronen Berelovich .

 "I have recently finished an independent documentary, The Zionist Story, in which I aim to present not just the history of the Israeli/Palestinian conflict, but also the core reason for it: the Zionist ideology, its goals (past and present) and its firm grip not only on Israeli society, but also, increasingly, on the perception of Middle East issues in Western democracies. These concepts have already been demonstrated in the excellent 'Occupation 101′ documentary made by Abdallah Omeish and Sufyan Omeish, but in my documentary I approach the subject from the perspective of an Israeli, ex-reserve soldier and someone who has spent his entire life in the shadow of Zionism. I hope you can find a moment to watch The Zionist Story and, if you like it, please feel free to share it with others. (As both the documentary and the archived footage used are for educational purposes only, the film can be freely distributed). I have made this documentary entirely by myself, with virtually no budget, although doing my best to achieve high professional standard, and I hope that this 'home-spun' production will be of interest to viewers." - Ronen Berelovich.   

சியோனிசம், இஸ்ரேல் பற்றிய முன்னைய பதிவுகள்:
1.  இஸ்ரேல் : பயங்கரவாதிகள் உருவாக்கிய தேசம்
2.போர்க்களமான புனித பூமி
3.சியோனிசத்திற்கு எதிராக போராடும் யூத மதகுருவின் கதை

Monday, November 19, 2012

சியோனிசத்திற்கு எதிராக போராடும் யூத மதகுருவின் கதை

இஸ்ரேல் என்பது, "யூதர்களின் தாயகம்" என்றும், அது பாலஸ்தீனர்களை மட்டுமே அடக்குவதாக பலர் நினைக்கிறார்கள். ஆனால், உலகில் எத்தனையோ யூதர்கள், இஸ்ரேல் என்ற தேசத்தையும், சியோனிசக் கொள்கையையும் ஏற்றுக் கொள்வதில்லை. அவர்கள் இஸ்ரேலில் வாழ்ந்தால், அரசு சிறையில் போட்டு சித்திரவதை செய்கின்றது. வெளிநாடுகளில் வாழ்ந்தால், வாயை அடைக்க வைக்க பல்வேறு வழிகளில் முயல்கின்றது. மாறுபட்ட அரசியல் கொள்கை காரணமாக, இஸ்ரேலிய அரசினால் கைது செய்யப்பட்டு, சித்திரவதை செய்யப்பட்ட யூத மதகுரு ஒருவரை உங்களுக்கு அறிமுகம் செய்து வைக்கிறேன். அவர் இறுதியில் விடுதலை செய்யப்பட்டு, நெதர்லாந்து வந்து சேர்ந்து, தற்பொழுது ஆம்ஸ்டர்டாம் நகரில் வசிக்கின்றார். ஆனால்,  அவரின் மனைவியையும், மகனையும் இஸ்ரேலிய அரசு தடுத்து வைத்திருப்பதால், அவர்களை பிரிந்து வர வேண்டிய அவலம் நேர்ந்தது. இன்று வரையில், தனது மனைவியும், மகனும் எங்கே இருக்கிறார்கள் என்பது தெரியாமல் தவிக்கிறார். 

Josef Antebi  என்ற யூத மதகுரு (Rabbi), ஆம்ஸ்டர்டாம் நகரில் நடந்த, "காஸா  போர் எதிர்ப்பு ஆர்ப்பாட்டத்தில்"  கலந்து கொண்டார். அப்போது தான் முதன்முதலாக அவரைப் பற்றி நான் கேள்விப் பட்டேன். ஆர்ப்பாட்டத்தில் முன்வரிசையில் நின்ற அவரை படம் எடுத்து, அதனை பேஸ்புக்கில் பகிர்ந்திருந்தேன். அந்தப் படம், பலரைக் கவர்ந்திருந்தது. (அந்தப் புகைப்படத்தை இங்கே இணைத்துள்ளேன்.) காஸா போர் எதிர்ப்பு பேரணி என்றால், அரேபியர்கள், அல்லது முஸ்லிம்கள் மட்டுமே கலந்து கொண்டிருந்திருப்பார்கள் என்பது பலரின் எதிர்பார்ப்பு. ஆனால், ஆம்ஸ்டர்டாமில் நடந்த ஆர்ப்பாட்டத்தில், பல்லின மக்கள் பங்களித்திருந்தனர். பெருமளவு (இடதுசாரி) டச்சுக் காரர்களும் வந்திருந்தனர். ஆனால், யூதர்கள் அதிலும் மதகுருக்கள் கலந்து கொள்வார்கள் என்று யாரும் எதிர்பார்த்திருக்க மாட்டார்கள். இங்கேயுள்ள படத்தில் காணப்படும், ஜோசெப் என்ற யூத மதகுரு, வருகிற திங்கட்கிழமை காஸா போகப் போவதாக அறிவித்துள்ளார். அதன் பிறகு தான், அவரைப் பற்றிய தகவல்கள் பல எனக்குத் தெரிய வந்தன. 

இன்றைய இஸ்ரேலில் வாழும், 90 சதவீதமான யூதர்கள் ஐரோப்பிய நாடுகளில் இருந்து வந்தேறிய குடிகள் ஆவர். அன்றைய பிரிட்டிஷ் காலனியான பாலஸ்தீனத்தில் வாழ்ந்த யூதர்கள், இன்று சொந்த நாட்டில் சிறுபான்மையினராக உள்ளனர். ஐரோப்பிய யூதர்கள் குடியேறும் வரையில், பாலஸ்தீனத்தில் யூதர்களும், அரேபியர்களும் ஒற்றுமையாக வாழ்ந்து வந்தனர். அவர்களுக்கிடையில் இனப்பகை சிறு துளியேனும் இருக்கவில்லை. இருபதாம் நூற்றாண்டின் தொடக்கத்தில், சியோனிசம் என்ற கொள்கை வழி நடந்த தேசியவாத யூதர்கள், பாலஸ்தீனத்தில் வந்து குடியேறினார்கள். இரண்டாம் உலகப்போருக்கு முன்னும், பின்னும் ஆயிரக்கணக்கான ஐரோப்பிய யூதர்கள் வந்து குடியேறியதால், அவர்களுக்கான வசிப்பிடங்களை உருவாக்குவதற்கான தேவை ஏற்பட்டது. அதுவே பிற்காலத்தில், "இஸ்ரேல் என்ற தேசத்திற்கான சுதந்திரப் போர்"  என்று அழைக்கப் படலாயிற்று. வந்தேறுகுடிகளான ஐரோப்பிய யூதர்கள், பாலஸ்தீனத்தில் வாழ்ந்த அரேபியரின் நிலங்களை அபகரித்து, குடியேற்றங்களை உருவாக்கினார்கள். நில அபகரிப்பை எதிர்த்த அரேபியரை தாக்கினார்கள். அப்போது அங்கு வாழ்ந்த "பாலஸ்தீன யூதர்கள்", அரேபிய அயலவரின் பக்கம் நின்று போராடினார்கள். 

தற்பொழுது ஆம்ஸ்டர்டாமில் வசிக்கும் யூத மதகுருவான ஜோசெப், ஒரு பாலஸ்தீன யூதராக, பாலஸ்தீனத்தில் பிறந்து வளர்ந்தவர். அவர் தனது வாழ்க்கை கதையை, சுருக்கமாக கூறினார்:
"நான் ஒரு பாலஸ்தீன யூத குடும்பத்தை சேர்ந்தவன். பாலஸ்தீன விவசாயிகளுடன் சமாதானமாக வாழ்ந்து வந்தோம். யூதர்கள் அல்லாத பாலஸ்தீனியர்கள் மீதான சியோனிச தாக்குதல்களை ஒன்று சேர்ந்து எதிர்த்து வந்தோம். அதற்காக நான் பெரியதொரு விலை கொடுக்க வேண்டியிருந்தது. என்னைப் போன்ற, பாலஸ்தீனத்தில் பிறந்த யூதர்கள், சியோனிசத்தை எதிர்த்து போராடுவதை இஸ்ரேலிய அரசினால் பொறுத்துக் கொள்ள முடியவில்லை. என்னை கடத்திச் சென்று, சிறையில் அடைத்து வைத்தார்கள். சித்திரவதை செய்தார்கள். கடைசியில் நாட்டை விட்டு வெளியேறினேன். நான் எனது மனைவியை இழந்தேன். எனது மகனை பதினெட்டு வருடங்களாக பார்க்கவில்லை. அதனால் இப்போதும் வருந்திக் கொண்டிருக்கிறேன்.  பிறந்த இடத்தை விட்டு வெளியேறுவது எத்தனை வேதனையானது என்பது எனக்குத் தெரியும். பிள்ளையை இழப்பது எந்தளவு வலி எடுக்கும் என்பது எனக்குப் புரியும். அதனால் தான், காஸாவில்  அல்லலுறும் பாலஸ்தீன மக்களுக்கு உதவுவதற்காக, நான் அங்கே செல்லவிருக்கிறேன்." 

வருகிற திங்கட்கிழமை, ஆம்ஸ்டர்டாமில் இருந்து செல்லும் குழுவில் ஜோசேப்பும்  இடம்பெருகிறார். அந்தக் குழுவினர் முதலில் எகிப்து சென்று, எல்லை கடந்து காஸாவினுள்ளே நுழைய இருக்கின்றனர். இஸ்ரேலியப் படைகளின் முற்றுகைக்குள் சிக்கியுள்ள காசாவில், அவர்கள் பாலஸ்தீன மக்களுக்கு மனிதக் கவசமாக தங்கியிருப்பார்கள்.


கீழேயுள்ள வீடியோவில், யூத மதகுருவான ஜோசெப் சியோனிசத்திற்கு எதிராக போராடுவதற்கான காரணங்களை முன்வைக்கின்றார்: 

Rabbi Josef Antebi exposing Zionists, even after being tortured by them!

இஸ்ரேலில் தடுத்து வைக்கப் பட்டுள்ள மனைவியையும், பிள்ளையையும் இழந்து தவிக்கும் யூத மதகுரு ஜோசெப் பற்றிய தொலைக்காட்சி நிகழ்ச்சி:

 இதனுடன் தொடர்புடைய வேறு பதிவுகள்:
 இஸ்ரேலை நிராகரிக்கும் யூதர்கள் (வீடியோ)

Saturday, November 17, 2012

பண்டைய அரேபியரும், தமிழரும் : அறுந்து போன தொடர்புகள்


மாரிப் ஆலயம் 
நாம் கறுப்பர்! 
நமது மொழி தமிழ்! 
நம் தாயகம் ஆப்பிரிக்கா! - 14

(பதினான்காம் பாகம்)
____________________________________________
இஸ்லாமிய மதத்திற்கும், இந்து மதத்திற்கும் இடையில் சில ஒற்றுமைகள் உள்ளன. உதாரணத்திற்கு, புனிதமான நாளான வெள்ளிக்கிழமை.  சாமி கும்பிடுவது எப்படி என்று, இந்து மத நூல்களில் எழுதப் பட்ட விதிகளில் ஒன்று: "பஞ்சாங்க நமஸ்காரம்". அதாவது, முழந்தாளிட்டு, நெற்றி நிலத்தில் படுமாறு இறைவனை வணங்குதல்.  இந்துக் கோயில்களில் பெண்கள் இவ்வாறு சாமி கும்பிடுவதைக் காணலாம்.  முழந்தாளிட்டு, நெற்றி நிலத்தில் படுமாறு இறைவனை தொழுவதை முஸ்லிம்களும் பின்பற்றுகின்றனர். ஆகவே, அந்த தொழுகை முறை, இஸ்லாத்திற்கு முன்பிருந்த அரேபியாவிலும் இருந்திருக்க வேண்டும். தொழுகை மட்டுமல்ல, பிறைச்சந்திரன் கூட, இஸ்லாத்திற்கு முந்திய அரேபியாவில் கடவுளின் சின்னமாக இருந்துள்ளது. ஆதி கால அரேபியர்கள் மட்டுமல்ல, தமிழர்களும் சந்திரனுக்கு கோயில் கட்டி வழிபட்டனர்.  

பண்டைய அரேபியரின் மத சம்பிரதாயங்களை பின்பற்றினாலும், இஸ்லாம் ஒரு புரட்சிகரமான புதிய மதமாகும். விக்கிரக வழிபாட்டை ஒழித்துக் கட்டியது மட்டுமல்ல, அரேபியர் வழிபட்ட பல தெய்வங்களில் ஒன்றான அல்லாவை, ஒரேயொரு இறைவனாக ஆக்கியமை, அந்தக் காலத்தில் நடந்த மாபெரும் கலாச்சாரப் புரட்சி ஆகும். மோசேஸ் (யூதர்கள்), இயேசு (கிறிஸ்தவர்கள்), அகநாதன் (எகிப்தியர்கள்), சரதூசர் (ஈரானியர்கள்) ஆகிய தீர்க்கதரிசிகளும், முகமதுவுக்கு முன்னரே அது போன்ற மதப் புரட்சிகளை நடத்தி உள்ளனர். ஆகவே, இஸ்லாத்தையும், அதன் இறைதூதர் முகமதுவையும், மேற்குறிப்பிட்ட மதப்புரட்சிகளின் தொடர்ச்சியாகவே பார்க்க வேண்டும். அதனை இந்து மதம் போன்ற இன்னொரு மதமாக ஒப்பிடுவது அபத்தமானது. இருப்பினும், பண்டைய அரேபியரின் மத நம்பிக்கைகள், எந்தளவு தூரம் பண்டைய தமிழரின் அல்லது இந்துக்களின் மத நம்பிக்கைகளுடன் ஒத்துப் போகின்றது என்று பார்ப்பதில் தவறில்லை. வரலாற்று உண்மைகளை நாங்கள் இலகுவாக புறக்கணித்து விட முடியாது.   

யேமனில் குடியேறிய எத்தியோப்பியர்கள், அரேபிய - திராவிடர்களாக மாறினார்கள் என்பதை முன்னைய கட்டுரையில் பார்த்தோம். இந்தக் கட்டுரையில், அரேபிய - திராவிடர்களின் மத நம்பிக்கையை பார்ப்போம். 5000 வருடங்களுக்கு முன்னர், யேமன் "சபியர்களின் ராஜ்ஜியம்"  என்று அழைக்கப்பட்டு வந்தது. விவிலிய நூலில் குறிப்பிடப்படும், ஷீபா (அரபியில் சபா) வின் வழித்தோன்றல்கள் சபிய அரச வம்சத்தை உருவாக்கினார்கள். 20 ம்  நூற்றாண்டு வரை எத்தியோப்பியாவை ஆண்ட மன்னர்களும், சபிய அரச வம்சம் என்று தான் கூறிக் கொண்டனர். 

சபியர்களின் பிரதான தெய்வமாக சந்திரக் கடவுள் இருந்தது. அதற்கு நீங்கள் ஆதாரம் தேடி அலையத் தேவையில்லை. யேமன் சென்றால், அங்கே மாரிப் (Maribhttp://www.yementourism.com/tourism2009/destinations/index.php?ELEMENT_ID=2668) என்ற இடத்தில், அகழ்வாராய்ச்சியில் கண்டுபிடிக்கப்பட்ட, சந்திரக் கடவுளுக்கு கட்டப்பட்ட அழகிய தூண்களைக் கொண்ட கோயிலைக் கண்டு களிக்கலாம்.  சபியர்கள் சந்திர தெய்வத்தை, "இலு முகா" என்று அழைத்தனர். இலு என்பது அக்காடியர்கள் காலத்திலும், பிரதான தெய்வத்தைக் குறித்தது. அல்லா என்ற சொல்லின் மூலம், "இலு" விலும் இருக்கலாம். ஆனால், அல்லா என்ற சொல் கூட இஸ்லாத்திற்கு முன்னர் பயன்பாட்டில் இருந்து வந்துள்ளது. 

அரேபியாவைப் பற்றி, நமக்குத் தான் பெரிதாக ஒன்றும் தெரியாது. ஆனால், பண்டைய இந்தியர்கள் நெருங்கிய தொடர்பு வைத்திருந்தார்கள். வாயு புராணத்தில், ஏழு கண்டங்கள் பற்றிய குறிப்பு ஒன்று வருகின்றது. சப்த துவீபங்கள் என்று அவற்றைக் குறிப்பிடுகின்றது. அதில் ஒன்று, கூஷ துவீபம், இன்றைக்கு அது அரேபியா என்று அழைக்கப் படுகின்றது. இரண்டாயிரம் வருடங்களுக்கு முன்னர் அரேபியர் என்ற இனம் இருக்கவில்லை. ஆனால், அரபு மொழி போன்ற மொழிகளைப் பேசிய, பல்வேறு இனக்குழுக்கள் இருந்துள்ளன. சந்திரக் கடவுளுக்கு, அவர்களின் மொழிகளில் பெயரிட்டிருந்தனர். ஆச்சரியப் படத் தக்கவாறு, அந்தச் சொற்கள் தமிழ்ச் சொற்கள் போன்றுள்ளன. 

கதாபானியன் (Qatabanian) என்ற  அரபி இனக்குழு, சந்திரனை "அம், அம்பை" என்ற பெயர்களில் வணங்கியது.  அம்மா, அம்பை என்ற பெயரில், இந்து மத பெண் தெய்வங்கள் இருப்பதை நான் இங்கே குறிப்பிடத் தேவயில்லை. அரேபியர்கள், சந்திரனை சில சமயம்  ஆணாகவும், சில சமயம் பெண்ணாகவும் கருதி வழிபட்டு வந்தனர். ஆகவே, ஹடாமிஸ் என்ற இன்னொரு அரபி இனக்குழு, "சின்" என்ற பெயரில் ஆண் தெய்வமாக வழிபட்டதில் வியப்பில்லை. 

சின் என்ற சொல் பாபிலோனியர்கள் காலத்திலும் பயன்பாட்டில் இருந்துள்ளது. அவர்களது மத நம்பிக்கையின் படி, என்லில், நின்லில் கடவுளரின் மகன் தான் சின் என்ற சந்திரக் கடவுள். சின் என்ற சொல்லில் இருந்து தான், சமஸ்கிருதச் சொல்லான சந்திரன் தோன்றியது. தமிழர்களும் அந்தக் கலாச்சாரத்தை பின்பற்றி வருகின்றனர்.  உதாரணத்திற்கு, நிலா என்பது பெண். சந்திரன் என்பது ஆண். பண்டைய தமிழர்களும், சந்திரனை ஒரு பெண் தெய்வமாக வழிபட்டு வந்தமை தொல்காப்பியத்தில் எழுதப் பட்டுள்ளது. அது பற்றிய விபரங்களை, இன்னொரு இடத்தில் ஆராய்வோம்.   

இனி, சந்திரக் கடவுளின் பூர்வீகம் பற்றி அறிந்து கொள்வோம். மாரிப் கோயில் இடிபாடுகளில், அந்தக் கடவுளைக் குறிக்கும் பின்வரும் சொல் கண்டுபிடிக்கப்  பட்டது: "LMQH".  இதனை "அல்மகா" என்றும் "இல்முகா" என்றும் மொழிபெயர்க்கின்றனர்.  அல்லா என்ற சொல் கூட அதிலிருந்து தோன்றியிருக்கலாம் என்பது சில அறிஞர்களது வாதம். 

அல்மகா என்பதை, முழுக்க முழுக்க சந்திரக் கடவுளாக புரிந்து கொள்ள முடியாது. அல்மகா தெய்வம், மாரிப்  கோயிலுக்கு அருகில் உள்ள தடாகத்தில் நீராடுவதாக ஐதீகம். அந்தக் கோயிலில் திருவிழாக்கள் நடைபெற்ற காலங்களில், மூலமூர்த்தி சிலையை எடுத்து வந்து தீர்த்தக் கேணியில் நீராட்டி எடுத்துச் செல்வார்கள். அது இந்துக் கோயில்களில் சாமி தீர்ததமாடுவதைப் போன்று அதே நடைமுறை தான். இது பண்டைய எகிப்தியரின், சூடானியரின் எருமை மாட்டு தெய்வம் நீராடும் மத நம்பிக்கையை ஒத்திருக்கின்றது. 

இன்றைக்கும், சூடானில், கென்யாவில் வாழும் மாசாய் என்ற ஆப்பிரிக்க இனத்தவர் வாழ்வில், மாடு இன்றியமையாத விலங்கு. தமிழர்கள் மாட்டுப் பொங்கல் கொண்டாடுவதைப் போன்று, ஆப்பிரிக்கர்கள் மாட்டுக்கு மரியாதை கொடுத்து வந்தனர். பண்டைய கால ஆபிரிக்க மக்கள், எருமை மாடு குளத்தில் நீராடுவதை புனிதமாக கருதினார்கள். அதிலிருந்து அவர்களின் மத நம்பிக்கை உருவானது. "ஒரு மாட்டை கடவுளாக வழிபடலாமா?"  என்று நாகரீகமடைந்த சமூகத்தை சேர்ந்த நாங்கள் வியப்படைகிறோம். 

அந்த எண்ணம், அன்றைய அரேபிய - திராவிடர்கள் மனதிலும் தோன்றியிருக்கலாம். அதனால், பண்டைய யேமனில் வாழ்ந்த மக்கள், மாட்டுத் தெய்வத்தை வெறும் குறியீட்டுடன் மட்டும் நிறுத்திக் கொண்டார்கள். ("இந்துக்கள்" அதனை சிவபெருமானின் வாகனமாக்கினார்கள்) அதாவது, ஆப்பிரிக்கர்களின் பூர்வீக மத நம்பிக்கை, வேறு வடிவம் எடுத்தது. கடவுள் குழந்தையாக அவதரித்து நீராடுவதாக காட்டும் திருவிழாக்கள், அரேபியா தீபகற்பம் முழுவதும் நடந்துள்ளன. 

முருகன் ஒரு தமிழ்க் கடவுள் என்று கூறுகின்றார்கள். முருகக் கடவுள், குழந்தையாக சரவணப் பொய்கையில் நீராடுவதாக இந்துக்கள் நம்புகின்றனர். சரவணப் பொய்கையில் நீராடும் முருகனின் கதையும், யேமன் அல்மகா தெய்வத்தின் கதையும் ஒரே மாதிரியாக உள்ளன. மேலும் பெயர்களும் கிட்டத்தட்ட ஒரே மாதிரி உள்ளன. பண்டைய யேமனியர்கள் வழிபட்ட, அல்மகா அல்லது இல்முகா என்ற சொல்லும், ஷண்முகா என்ற சொல்லும் ஒரே மாதிரி ஒலிக்கின்றன. சின் என்பது ஷன் என்றும் மாறியிருக்கலாம். அதனை நிரூபிப்பதற்கு என்னிடம் ஆதாரங்கள் எதுவும் இல்லை. 

இருப்பினும், தமிழர்களும், அரேபியரும் ஒரே இடத்தில் இருந்து குடிபெயர்ந்த ஓரின மக்கள் என்றால், அவர்களது தெய்வ நம்பிக்கையும் ஒன்றாக இருந்திருக்க வேண்டுமல்லவா? அதற்கான ஆதாரங்கள் தாராளமாகவே கிடைக்கின்றன. சங்க காலத் தமிழர்கள், சேயோன் என்ற குழந்தைக் கடவுளை வழிபட்டனர். சேயோனும், முருகனும் ஒன்று என தமிழ் அறிஞர்கள் கூறுகின்றனர். பண்டைய தமிழர்கள், கொற்றவை என்ற பெண் தெய்வத்தையும் வழிபட்டனர். கொற்றவையின் மகன் தான் சேயோன் அல்லது முருகன். சங்ககாலத்திற்கு பிந்திய இலக்கியங்களான, கலித்தொகை, திருமுருகாற்றுப் படையில் மட்டுமே, முருகன், சிவனுக்கும், பார்வதிக்கும் மகனாக குறிப்பிடப் படுகின்றது. ஆகவே, தாயும், மகனுமான கொற்றவையும், சேயோனும் தமிழர்களின் தெய்வங்கள் என்றால், அவை அரேபியாவிலும் இருந்திருக்க வேண்டுமல்லவா? 

பண்டைய தமிழகத்தில், அரசர்களும் படையினரும், போருக்கு போவதற்கு முன்னர், கொற்றவையை வழிபட்டு விட்டுச் செல்வார்கள். ஈராக்கில் வாழ்ந்த எமது முன்னோர்கள் காவிக் கொண்டு வந்த சம்பிரதாயங்களில் ஒன்றாக அது இருக்கலாம். ஏனெனில், பண்டைய ஈராக்கில், போருக்கு புறப்படுவதற்கு முன்னர், சுமேரிய அல்லது பாபிலோனிய அரசர்களும், படையினரும் இஷ்தார் அல்லது இனானா என்ற பெண் தெய்வத்திற்கு பூஜை செய்யும் சம்பிரதாயம் நிலவியது. கொற்றவை, அரபு நாடுகளில் வழிபடப் பட்டு வந்தமைக்கு,  இன்னொரு ஆதாரமும் உண்டு. பண்டைய அரேபியர்கள், "அல் குற்றவை" (Al Kutbay ) என்ற தெய்வத்தை வழிபட்டனர். இது இந்துக்களின் சரஸ்வதி போன்று, கல்வித் தெய்வமாகும். அந்த தெய்வத்தின் பெயரில் இருந்து தான், கிதாப் (ktb) என்ற அரபிச் சொல் வந்தது. அரபி மொழியில் கிதாப் என்றால், எழுதுதல் என்ற வினைச் சொல்லுக்கும், புத்தகம் என்ற பெயர்ச் சொல்லுக்கும் வரும். தமிழ் மொழியில், கற்றல், புத்தகம் ஆகிய சொற்களுக்கும் இடையில் ஒற்றுமை இருப்பதை அவதானிக்கவும். தமிழ் பண்பாட்டுக்கும், அரபி பண்பாட்டுக்கும் இடையிலான அதிசயப்படத்தக்க ஒற்றுமைகள், இத்துடன் முடியவில்லை. இன்னும் நிறைய இருக்கின்றன. 

நமது காலக் கணிப்பில் (கி.பி.) 4 ம் நூற்றாண்டில், கிறிஸ்தவ மதம் பரவியிருந்தது என்பது எல்லோருக்கும் தெரிந்த உண்மை. முதன்முதலாக கிறிஸ்தவமயமான நாடுகளில் சைப்பிரசும் ஒன்று. சைப்பிரசில் சலாமிஸ் என்ற நகரில் இருந்த தலைமை மதகுரு (பிஷப்) எபிபானியுஸ் (Epiphanius), அரேபியரின் மத நம்பிக்கைகள் பற்றிய குறிப்புகளை எழுதி வைத்துள்ளார். (http://en.wikipedia.org/wiki/Epiphanius_of_Salamis)  இன்றைய ஜோர்டானில் வாழ்ந்த நபெத்தியர்கள், அல்லாவின் பிறப்பைக் கொண்டாடும் திருவிழா பற்றிய குறிப்புகள் அவை. அந்தக் குறிப்புகள் எமக்கு குழந்தை ஏசுவை நினைவு படுத்துகின்றன. கோயில் மூலஸ்தானத்தில் வைக்கப்பட்டிருந்த குழந்தைக் கடவுளின் சிலையை, வெளியே எடுத்துக் கொண்டு வந்து, பக்தர்கள் வணங்குவதற்கு வைத்து விட்டு, பின்னர் உள்ளே கொண்டு செல்வார்கள். இன்றைய இந்துக் கோயில்களில் நடப்பதைப் போன்ற, தீர்த்தத் திருவிழா, தேர்த் திருவிழா எல்லாம் பண்டைய ஜோர்டான் நாட்டில் நடந்துள்ளன. (இந்துக் கோயில்களில் நடைபெறும் சடங்குகளான, சுவாமி வீதி உலா வருதல், தீர்த்தமாடுதல் போன்ற திருவிழாக்களின் தாயகம் எகிப்து ஆகும்.)  

அல்லா என்ற குழந்தைக் கடவுளின், தாய்க் கடவுளின் பெயர்: "அல் லாத்". பண்டைய அரேபியரின் மத நம்பிக்கையில், அல்லா என்பது ஆண் தெய்வத்தையும், அல் லாத் என்பது பெண் தெய்வத்தையும் குறிக்கும். இரண்டாயிரம் வருடங்களுக்கு முன்பு, தாய் வழிச் சமுதாயம் நிலவியதால், "தகப்பன் கடவுள்" இருக்கவில்லை. அதனால் அல் லாத் என்ற பெண் தெய்வத்தையும், அதன் மகனான  அல்லா என்ற குழந்தைத் தெய்வத்தையும் மட்டுமே பிரதானமாக கருதினார்கள். தமிழர்கள் கொற்றவையையும், அந்த தெய்வத்தின் மகனான சேயோனையும் பிரதானமாக கருதி வழிபட்டனர். பண்டைய அரேபியர் போன்று, பண்டைய தமிழர்களும் தாய் வழிச் சமுதாயத்தை நீண்ட காலத்திற்கு பின்பற்றி வந்தனர். இந்தியாவில் தந்தை வழிச் சமூக அமைப்பு வந்த பின்னர் தான், அதாவது  சங்க காலத்திற்கு பிந்திய காலம், முருகனுக்கு சிவன் தகப்பனாக மாறினார். அதே போன்ற ஒரு பண்பாட்டு மாற்றம் அரேபியாவிலும் இடம்பெற்றது. பெண் தெய்வமான அல் லாத் பின்தள்ளப் பட்டு, ஆண் தெய்வமான அல்லா முக்கியத்துவம் பெற்றது. 

தென்னிந்தியாவில், முருகக் கடவுளை குழந்தை தெய்வமாக வழிபடுவது குறிப்பிடத் தக்கது. குழந்தை முருகன், குழந்தை ஏசு, குழந்தை அல்லா, எல்லாம் ஒரே மூலத்தில் இருந்து பிறந்த மத நம்பிக்கைகள் தான். பண்டைய ஜோர்டான் நாட்டில் வாழ்ந்த நபெத்தியர்கள், குழந்தை அல்லாவை, "துஷாரா" என்று பெயரிட்டு அழைத்தனர். துஷாரா என்பது, அந்தப் பிரதேசத்தில் உள்ள மலையில் (ஷாரா) வாழும் கடவுள் ஆகும். (Dhu i Shara) தமிழர்கள் முருகனை மலை வாழ் தெய்வமாக, குறிஞ்சிக் கடவுள் என்று வழிபடுவது குறிப்பிடத் தக்கது.  துஷாரா என்ற மலைக் கடவுள் சிவனையும் குறிக்கலாம். ஏனெனில், நபெத்தியர்கள் துஷாராவை குறிக்க மாட்டையும் சின்னமாக பயன்படுத்தினார்கள். ஆப்பிரிக்க மக்கள் புனிதமாக கருதி வழிபட்ட மாடு, நபெத்தியர்களால் துஷாராவாகவும், இந்துக்களால் நந்தியாகவும் கருதப் பட்டது. ஹரப்பா அகழ்வாராய்ச்சியில் கண்டெடுக்கப்பட்ட, மாட்டு சின்னம் பொறித்த முத்திரையை இங்கே நினைவு படுத்திக் கொள்வோம். தமிழர்கள், அரேபியர்கள், ஆப்பிரிக்கர்கள் ஆகிய "மூவினத்தவர்களும்", ஒரே நாகரீகத்தை பகிர்ந்து கொள்கின்றனர் என்பதற்கு, இதை விட வேறென்ன ஆதாரம் வேண்டும்? இப்போதும் நம்ப மாட்டேன் என்று அடம் பிடிப்பவர்களுக்காக, இன்னும் தேடுவோம். 

(தொடரும்)


இந்தத் தொடரின் முன்னைய பதிவுகளை வாசிப்பதற்கு:

1.நாம் கறுப்பர்! நமது மொழி தமிழ்! நம் தாயகம் ஆப்பிரிக்கா!
2.பண்டைய எகிப்தின் பத்தினித் தெய்வம்: கண்ணகி அம்மன்
3.சோமாலியர்கள்: தமிழர்களின் மூதாதையர்கள்
4.தமிழர்கள் தொலைத்த ஆப்பிரிக்கக் கடவுள்
5.கோயிலில் பாலியல் தொழில்
6.ஈராக்கில் தோன்றிய தமிழரின் நாகரீகம்
7.ஆடியில் உயிர்த்தெழுந்த, திராவிடர்களின் "கறுப்பு இயேசு!"
8.வேல் முருகன் குடியிருந்த பாக்தாத் நகரம்
9.சிரியாவில் தமிழுக்கு "தம்முழ்" என்றும் பெயர் !
10.கோபுரங்கள் கட்டுவது, ஆண்டவருக்கு விரோதமானது!
11.சிவபெருமான்: ஈராக்கை ஆண்ட கறுப்பின அரசன்?
12.அரபு நாட்டவர்க்கும் இறைவனான சிவனே போற்றி!
13.ஆதித் தமிழ் சகோதர இனம் வாழ்ந்த "அரபி கண்டம்"


  உசாத்துணை நூல்கள்:
1. From Babylon to Timbuktu, by Rudolph R.Windsor
2. Serpent of the Nile, Women and Dance in the Arab World, by Wendy Buonaventura
3. Myths, Dreams and Mysteries: The Encounter Between Contemporary Faiths and Archaic Realities, by Mircea Eliade
4. Myths of Babylonia and Assyria, by Donald A. Mackenzie
5. Mythology, by C. Scott Littleton
6. Babylon, De Echte Stad en de Mythe, by Tom Boily
7. Civilisation One, by Christopher Knight and Alan Butler
8. Persian Myths, by Vesta Sarkhosh Curtis
9. Precolonial Black Africa, by Cheikh Anta Diop
10. Black Arabia & The African Origin of Islam, by Dr. Wesley Muhammad
11. Kusha-Dwipa: The Kushites of Asia, by Dr. Clyde Winters

Wednesday, November 14, 2012

கொலம்பிய புரட்சி இயக்கத்தில் ஒரு ஐரோப்பிய பெண் போராளி


கொலம்பியாவில் ஒரு ஆயுதப் புரட்சி மூலம் மார்க்சிய-லெனினிச அரசை அமைப்பதற்காக, கடந்த பல தசாப்தங்களாக போராடிக் கொண்டிருக்கும் FARC இயக்கம், தற்பொழுது அரசுடன் சமாதான பேச்சுவார்த்தைகளில் பங்குபற்றுகின்றது. நோர்வே, கியூபாவின் மத்தியஸ்தத்துடன் நடைபெறும் பேச்சுவார்த்தைகளில் ஒரு நெதர்லாந்து பெண்மணியும் கலந்து கொள்கிறார்.

தான்யா நைமையர் (Tanja Nijmeijer), பல்கலைக்கழக பட்டப் படிப்பை முடித்த பின்னர், கொலம்பியா சென்று FARC  இயக்கத்தில் தன்னை இணைத்துக் கொண்டார். இயக்கத்தில் அவரது பெயர் அலெக்சான்ட்ரா. ஒரு தடவை, கொலம்பிய இராணுவ நடவடிக்கையின் பின்னர், கைப்பற்றப்பட்ட FARC முகாமில் இருந்து, தான்யாவின் தினக்குறிப்பேடு கண்டுபிடிக்கப் பட்டது. அது ஊடகங்களுக்கு பகிரங்கப் படுத்தப் பட்ட பின்னரே, நெதர்லாந்து பெண் போராளி பற்றி உலகம் அறிந்து கொண்டது. கொலம்பியா தலைநகர் பகொட்டாவில் இடம்பெற்ற குண்டுவெடிப்பு சம்பவம் ஒன்றில் சம்பந்தப் பட்டதற்காக, கொலம்பிய அரசினாலும், அமெரிக்க அரசினாலும் தேசப்படும் பயங்கரவாத சந்தேகநபரான தான்யா, ஒஸ்லோவில் நடந்த முதலாம் கட்ட பேச்சுவார்த்தையில் பங்குபற்ற தடை விதிக்கப்பட்டது. இருப்பினும், இந்த வாரம் கியூபாவில் நடைபெறும் இரண்டாம் கட்ட பேச்சுவார்த்தையில் கலந்து கொள்ள அனுமதிக்கப் பட்டார். கியூபா வந்த தான்யாவை, நெதர்லாந்து பத்திரிகையாளர்கள் சந்தித்து பேட்டி கண்டனர். அந்தப் பேட்டியில் பேசப்பட்ட விடயங்களை இங்கே மொழிபெயர்த்து தருகிறேன். 
----------------------------------------------------------------------------------------------------------

(நெதர்லாந்து நாட்டை சேர்ந்த FARC பெண் போராளி தான்யா நைமையர், முதல் தடவையாக நெதர்லாந்து ஊடகங்களுக்கு வழங்கிய நேர்காணல்)

FARC இயக்கத்தில், அலெக்சான்ட்ரா என்று அழைக்கப் படுபவர், அனைத்துக் கேள்விகளுக்கும் பதிலளிக்க தயாராக இருக்கிறார். தான்யா நைமையர் (34 வயது), ஒரு வாரம் கியூபாவில் தங்கியிருக்கும் வேளை, இணையம் ஊடாக அவரைப் பற்றியும், கொலம்பிய நிலைமை, FARC  இயக்கம் பற்றிய கேள்விகளுக்கு பதிலளிக்கிறார்.

FARC  இயக்கம் குறித்து, ஊடகங்கள் எதிர்மறையான கருத்துக்களை கொண்டிருப்பதையிட்டு அவர் அறிந்திருக்கிறார். "பல வருடங்களாக, ஊடகங்கள் FARC  எதிர்ப்பு பிரச்சாரத்தில் ஈடுபட்டு வருகின்றன. நாங்கள் ஏன் போராடுகின்றோம் என்று, எமது பக்க நியாயம் குறித்து பேசுவதற்கு, எமக்கு சந்தர்ப்பம் வழங்கப் படவில்லை." குண்டுத் தாக்குதல்கள், கடத்தல்கள் இவற்றை சுற்றித் தான் அந்த உருவகம் கட்டமைக்கப் படுகின்றது, என்று அவர் கருதுகிறார். "எவராவது அரசுக்கு வரி செலுத்தா விட்டால், சிறைக்கு செல்ல வேண்டும். எவராவது எமது இயக்கத்திற்கு புரட்சிகர வரி கட்டா விட்டால், எங்களது சிறையில் அடைத்து வைப்போம். நாம் அப்படிச் செய்தால், அதனை ஆட் கடத்தல் என்று கூறுகின்றனர்." தான்யா இங்கே புரட்சிகர வரி என்று குறிப்பிடுவது, வணிக நிறுவனங்கள் FARC  இயக்கத்திற்கு மாதாமாதம் கட்ட வேண்டிய தொகையை ஆகும். 

"(குண்டுத்) தாக்குதல்கள் பற்றிய எமது நிலைப்பாடு இது: நாங்கள் ஒரு இராணுவம். உயிர்களைக் கொல்லும்  ஆயுதங்களுக்கு எதிராக நாங்களும் ஆயுதங்களை பாவிக்கிறோம். நாங்கள் இராணுவம், துணைப்படை, பொலிஸ் ஆகிய அரச படைகளை எதிர்த்து போராடி வருகின்றோம். அந்தப் போராட்டத்தில் மரணங்கள் சம்பவிக்கின்றன. ஏனென்றால் இது ஒரு யுத்தம். அவர்கள் எங்களை தாக்குகிறார்கள். நாங்கள் அவர்களை தாக்குகின்றோம்." ஆயுதப் போராட்டம் பின்னடைவை அடையவில்லை என்று அந்த நெதர்லாந்து பெண்மணி கருதுகின்றார். கொலம்பியாவில் அமைதியான வழியில் அரசியல் நடத்துவதற்கு இடமில்லை. எண்பதுகளில் எமது அரசியல் கட்சி, முற்று முழுதாக அழித்தொழிக்கப் பட்டது. இடதுசாரி சிந்தனை கொண்டவர்கள் கொன்றொழிக்க பட்டனர். அது நியாயமானது அல்ல. மக்களுக்கு எதிராக அளவுக்கதிகமான அடக்குமுறையை பிரயோகிக்கும் நாட்டில் ஜனநாயகம் பற்றி பேச முடியாது. ஒரு வேளை உணவுக்காக, தமது ஓட்டுக்களை விற்குமளவிற்கு வறுமை அங்கே தாண்டவாடுகின்றது. இப்படியான நிலைமையில், அந்த நாட்டில் ஜனநாயக அடிப்படையில் தெரிவு செய்யப்பட்ட அரசாங்கம் இருப்பதாக கூற முடியாது. 

தான் சமாதான பேச்சுவார்த்தையில் கலந்து கொள்வது, சர்வதேச ஊடகங்களின் கவனத்தை ஈர்ப்பதற்காக என்ற கூற்றை தான்யா மறுக்கின்றார்.  "பத்து வருடங்களாக FARC  இயக்கத்தில் போராளியாக இருப்பதாலும், ஆங்கிலம் பேசுவதாலும், ஆவணங்களை மொழிபெயர்க்க முடியுமென்பதாலும்...." கலந்து கொள்வதாக அவர் தெரிவித்தார். ஒரு வசதியான செல்வந்த நாட்டில் வாழ்ந்த, பட்டதாரியான தான்யா, தான் ஒரு கெரில்லா போராளியாக கொலம்பிய நாட்டிற்கு வேண்டிய உதவிகளை செய்யலாம் என நம்புகின்றார். "எல்லா வகையான போராட்டங்களும் முக்கியமானவை. ஒரு கெரில்லா போராளியாவதை நானாகவே தெரிவு செய்து கொண்டேன். பிற போராளிகளுடன் உணர்வுத் தோழமையை வகுத்துக் கொண்ட மன நிறைவை அளிக்கின்றது. நான் ஒரு ஊடகவியலாளர் ஆக இருந்திருந்தால், சிலநேரம் நடுநிலையான செய்திகளை பகிர்ந்திருக்கலாம். ஆனால், அதனால் நான் அடையப் போவது என்ன?" 

கொலம்பியாவில் நடந்த தாக்குதல்களுக்காக குற்றம் சாட்டப் பட்டுள்ளதால் தனது எதிர்கால வாழ்வுக்கு எந்தவித இடையூறும் வராது என்று தான்யா நம்புகின்றார். "பேரூந்து ஒன்றில் நடந்த வெடிகுண்டுத் தாக்குதலில், எவருமே கொல்லப்படவோ, காயப்படவோ இல்லை. வரி செலுத்த மறுக்கும் வணிக நிறுவனங்கள் மீதான தாக்குதல்களும், நாடு இரவில் தான் இடம்பெறுகின்றன. அந்த தாக்குதல்களில் ஒரு பொதுமகனும் கொல்லப் படவில்லை என்பதை, நான் நூறு சதவீதம் உறுதியாக கூற முடியும்." சமாதான உடன்படிக்கை கைச்சாத்திடப் பட்டாலும், தான்யா கொலம்பியாவில் தங்கி விடவே விரும்புகின்றார். "FARC  ஒரு புரட்சிகர இராணுவம் என்பதற்கு அப்பால், ஒரு அரசியல் கட்சி ஆயுதமேந்தியுள்ளது என்றும் கூறலாம். சமாதானம் வந்தால், ஒரே இலக்கை நோக்கி அமைதியான வழியில் போராடுவோம். நான் எனது வாழ்நாள் முழுவதும் அந்த நாட்டிலேயே தங்கியிருப்பேன். எனது கனவு நனவாகும் வரையில், நான் அதற்காக போராட விரும்புகின்றேன்." 

(நன்றி: Het Parool, 12 november 2012)

(மொழிபெயர்ப்பு: கலையரசன்) 


கொலம்பியா பற்றிய முன்னைய பதிவுகள்:
1.கொலம்பியா: தென் அமெரிக்காவின் வியட்நாம்
2.FARC கெரில்லாக்களுடன் 10 நாட்கள்


Tuesday, November 13, 2012

ஒலிம்பிக்ஸின் தாயகம்

கிரேக்க நாட்டு பயணக் குறிப்புகள்  (பகுதி - 2)

பண்டைய கிரேக்கம் பற்றிய சில குறிப்புகள்: நாகரீகத்தின் தொட்டில் என ஐரோப்பியர்கள் சொந்தம் கொண்டாடினாலும், இந்த நாகரீகமடைந்த கிரேக்கம் ஆசியாவுடனும் (மெசப்பத்தோமியா), ஆப்பிரிக்காவுடனும் (எகிப்து) தொடர்புகளைப் பேணி வந்தது. அந்தக் காலத்தில், அதாவது 2000 வருடங்களுக்கு முன்பு, மேற்கு ஐரோப்பியர்கள் காட்டுமிராண்டிகளாக வாழ்ந்தனர். ரோமர்கள் கிரேக்க நாகரீகத்தை பின்பற்றியதுடன், பிற ஐரோப்பிய நாடுகளுக்கும் அதனைப் பரப்பினார்கள். ரோமர்கள், தமக்கு நாகரீகம் கற்பித்த கிரேக்கர்களையே, தமது சாம்ராஜ்யத்திற்குள் அடக்கினார்கள். மேற்கு ஐரோப்பாவில் ரோம சாம்ராஜ்யம் வீழ்ந்த பொழுது, கிழக்கு ஐரோப்பாவில் அது நிலைத்து நின்றது. "பிசாந்தின்"  என்றழைக்கப் பட்ட கிழக்கைரோப்பிய சாம்ராஜ்யத் தலைநகரம், கொன்ஸ்தாந்திநோபிலாக இருந்தது. அதுவே இன்றைய இஸ்தான்புல் நகரம் ஆகும். அப்போது அங்கே கிரேக்க மொழி ஆட்சிமொழியாக இருந்தது. பிசாந்தின் சக்கரவர்த்தி கொன்ஸ்டான்டின் கிறிஸ்தவ மதத்தை தழுவிக் கொண்டான். மன்னரின் வழியை பின்பற்றி மக்களும் கிறிஸ்தவர்களானார்கள்.

இவர்கள் தற்போதும் ஆதிக் கிறிஸ்தவர்கள் என்று அழைக்கப் படுகின்றனர். பிசாந்தின் ஆட்சியின் கீழிருந்த துருக்கி இனத்தவர்கள், இஸ்லாமிய மதத்தை தழுவியிருந்தனர். அவர்களை வழிநடாத்திய ஒஸ்மானிய குலத்தவர்கள், தமது படை வலிமையால் பிசாந்தின் இராஜ்ஜியத்தை கைப்பற்றி, தமது ஆட்சிப் பரப்பின் கீழ் கொண்டு வந்தனர். கிரேக்கமும் அவ்வாறு தான் துருக்கிவசமானது. முதலாம் உலகப்போர் வரை, கிரேக்கம் துருக்கியரால் ஆளப்பட்டு வந்தது. முதலாம் உலகப்போரின் முடிவில் பலவீனமுற்றிருந்த ஒஸ்மானிய சாம்ராஜ்யத்திற்கு எதிராக, நவீன கிரேக்க தேசியவாதிகள் கிளர்ச்சி செய்தனர். பிரிட்டனின் உதவியுடன், நவீன கிரேக்க தேசிய அரசு ஸ்தாபிக்கப் பட்டது. 

நவீன கிரேக்கம் என்று குறிப்பிடுவதற்கு பல காரணங்கள் உண்டு. பண்டைய கிரேக்கம் ரோம சாம்ராஜ்யத்தால் சீர்குலைக்கப் பட்டது. பின்னர் வந்த கிறிஸ்தவ மதம், கிரேக்கத்தை தனது சித்தாந்ததிற்குள் இழுத்து விட்டது.  துருக்கியர்கள் தமது கலாச்சாரத்தை அங்கு பரப்பி இருந்தனர். கிரேக்கர்களும், துருக்கியர்களும் பரம்பரைப் பகைவர்கள். அவர்களது பகைமை, கிறிஸ்தவ-இஸ்லாமிய மதப் பிரிவினையில் இருந்து வளர்ந்து வந்துள்ளது. இருப்பினும் இவ்விரு சமூகத்தவர்கள் இடையிலும், கலாச்சார ரீதியாகவும், உணவு முறையிலும், இசையிலும் நிறைய ஒற்றுமைகள் உள்ளன. இன்று என்ன தான் மேற்கத்திய கலாச்சாரம் (அல்லது அமெரிக்க கலாச்சாரம்) செல்வாக்குச் செலுத்தினாலும், கிரேக்க மக்களின் கீழைத்தேய மனப்பான்மை இன்னமும் நிலைத்திருக்கிறது. 


முன்னொரு காலத்தில் வாழ்ந்த, "கிரெகி" என்ற பழங்குடி இனத்தின் பெயரே, "கிரீஸ்", "கிரேக்கம்"  என்ற பெயர்களுக்கு அடிப்படையாகும். ஆனால், கிரேக்கர்கள் தமது நாட்டை "எல்லாஸ்"  என்ற பெயரிட்டு அழைக்கின்றனர். இது எலேனியர்கள் என்ற பல்வேறு பழங்குடி இனாகளை குறிக்கும் பெயர்ச் சொல் ஆகும். இன்று கிரேக்க நாட்டின் உத்தியோகபூர்வ பெயர்: எல்லாஸ். 2004 ம் ஆண்டு, ஏதன்ஸ் நகரில் ஒலிம்பிக் விளையாட்டுப் போட்டிகள் நடந்தன. உலகிற்கே ஒலிம்பிக் போட்டியை அறிமுகப் படுத்தியதும் கிரேக்கம் தான். உலகப் புகழ் பெற்ற பண்டைய ஒலிம்பிக் நகரம், அகழ்வாராய்ச்சியாளர்களால் புனரமைக்கப் பட்டு வருகின்றது. 

கிரீஸ், வருடம் முழுவதும் உல்லாசப் பயணிகளை கவரும் நாடு. உல்லாசப் பயணிகளை, புராதன பண்பாட்டுச் சின்னங்கள் இருக்குமிடத்திற்கு கூட்டிச் செல்வதற்கான பஸ் வண்டிகளில் கட்டணம் சற்று அதிகம். அதை விட, சாதாரண பொது மக்கள் பயணம் செய்யும், போக்குவரத்து சேவைகளை பயன்படுத்தலாம். ரயில் பயணத்திற்கான சீட்டு, மேற்கு ஐரோப்பிய நாடுகளுடன் ஒப்பிடும் பொழுது குறைவு தான். ஏதென்ஸ் நகரில் இரண்டு மத்திய ரயில் நிலையங்கள் உள்ளன. வடக்கே போக ஒன்று. கிழக்கே போக ஒன்று. 

தெருவில் ஆங்கிலம் பேசுவோரை சந்திப்பதற்கு அதிர்ஷ்டம் இருக்க வேண்டும். ரயில் நிலையம் போன்ற பொது இடங்களில் பணியாற்றும் ஊழியர்கள் ஆங்கிலம் பேசுகின்றனர். ஆனால், அடக்கமாக பதிலளிக்கும் சேவையாளர்களை கிரீஸ் முழுவதும் தேடினாலும் காண முடியாது. பண்டைய ஒலிம்பிக்ஸ் போட்டிகள் நடந்த இடமான, பெலோப்பெனோஸ் பிரதேசத்திற்கு செல்லும் ரயிலைப் பிடித்து, ஏறி அமர்ந்து கொண்டேன். ரயில் வண்டியில் நிறைய வெளிநாட்டவர்கள் காணப்பட்டனர். அவர்களில் பெரும்பான்மையானோர், பாட்ரா துறைமுகத்தில் வேலைக்காக சென்று கொண்டிருந்த தொழிலாளர்கள். 


தெற்கே போகும் ரயில், கடற்கரையோரமாக சென்று கொண்டிருந்தது. ஏதென்ஸ் நகரில் இருந்து, 200 கி.மி. தூரத்தில் கொறிந்த் கால்வாய் வருகின்றது.  சுயெஸ் கால்வாய் போன்று, இதுவும் மனிதனால் செயற்கையாக தோண்டப்பட்டது.  இதன் மூலம், பெலோப்பனோசுஸ் குடாநாடு, பிரதான நிலத்தில் இருந்து துண்டிக்கபட்டு தீவாக மாறியது. நடுவில் உள்ள கால்வாயின் ஊடாக கப்பற்போக்குவரத்து நடக்கின்றது. பெலோப்பெனோசுஸ் குடா நாட்டில் உள்ள பல இடங்களின் பெயர்கள், பைபிளில் (புதிய ஏற்பாடு) குறிப்பிடப் பட்டுள்ளன. (உதாரணத்திற்கு: கொறிந்த், பாட்ரா) முதன்முதலாக ஒலிம்பிக் போட்டிகள் நடைபெற்ற இடமும் அங்கு தான் உள்ளது. 


ஒலிம்பிக்ஸ் நுழைவாயில் 
"ஒலிம்பியா"  மலைகளின் மத்தியில் காணப்படும் ஒரு கிராமம். இரண்டாயிரம் வருடங்களுக்கு முன்பு, இந்த ஒலிம்பிக் கிராமத்தில் ஒலிம்பிக் போட்டிகள் நடத்தப் பட்டன. விளையாட்டு வீரர்கள் சுற்றியுள்ள நகரங்களிலிருந்து வந்து கலந்து கொண்டனர். அன்று இந்த விளையாட்டுப் போட்டிகள், தெய்வ சன்னிதானத்தின் முன்னே (கடவுளரை கௌரவிக்கும் முகமாக) நடாத்தப்பட்டன. ஒலிம்பிக் விளையாட்டுகளில், ஆண்கள் மட்டுமே கலந்து கொள்ள அனுமதிக்கப்பட்டனர். பெண்கள், பார்வையாளர்களாக கூட கலந்து கொள்ள முடியாது. 


பண்டைய ஒலிம்பிக்ஸ் போட்டிகள் நடைபெற்ற இடம் 
கி.மு. 776 ம் ஆண்டு தொடங்கப்பட்ட ஒலிம்பிக் போட்டிகள், கிறிஸ்தவ மதத்தின் வருகையுடன் நிறுத்தப்பட்டது. போட்டிகளில் கலந்து கொண்ட விளையாட்டு வீரர்கள் நிர்வாணமாக இருந்ததால், ஒலிம்பிக் விளையாட்டுகள் கிறிஸ்தவ மத அடிப்படைவாதிகளால் தடை செய்யப்பட்டன. (20 ம் நூற்றாண்டில், ஆப்கானிஸ்தானில் இஸ்லாமிய அடிப்படைவாதிகளான தாலிபான்களும் விளையாட்டுப் போட்டிகளை தடைசெய்திருந்தமை இங்கே குறிப்பிடத் தக்கது.)  தற்காலத்தில் பெருமளவு உல்லாசப்பிரயாணிகளை கவரும் இடமாக ஒலிம்பியா இருந்தாலும், அங்கே பார்ப்பதற்கு எதுவும் எஞ்சியிருக்கவில்லை. கட்டிடங்கள் இருந்த இடம் தெரியாமல், இடிபாடுகளுடன் அழிவுற்ற நிலையில் காணப்படுகின்றன. செயுஸ் கடவுளுக்கு கட்டப்பட்ட ஆலயம் மட்டுமே, ஓரளவு முழுமையாக உள்ளது. 

(தொடரும்)


கிரேக்க பயணக் கதையின் முன்னைய பதிவுகள்:

Thursday, November 08, 2012

பயணச் சீட்டு வாங்காமல் பயணம் செய்வோர் சங்கம்

உழைக்கும் வர்க்க மக்களை சுரண்டும் முதலாளித்துவத்திற்கு எதிரான மக்கள் போராட்டம், சமூகத்தின் பல மட்டங்களிலும் நடந்து கொண்டிருக்கிறது. பேரூந்து வண்டிகளில், ரயிலில் டிக்கட் வாங்காமல் பயணம் செய்வதும் ஒரு வகைப் போராட்டம் தான். பெரும்பான்மையான மக்கள், போக்குவரத்து கட்டண உயர்வை எதிர்த்து வீதியில் இறங்கி ஆர்ப்பாட்டம் செய்வதில்லை.  ஆனால்,தமக்குத் தெரிந்த வழியில்,  அரசுக்கும், முதலாளிகளுக்கும் புரியும் மொழியில் தமது எதிர்ப்பை பதிவு செய்கின்றனர்.  நாளாந்தம் விலைவாசி ஏறிக் கொண்டேயிருந்தால், கிடைக்கும் சொற்ப வருமானம் வயிற்றுப்பாட்டுக்கே போதாது என்றால், மக்கள் என்ன செய்வார்கள்? ஐரோப்பாவிலும், பல தீவிர இடதுசாரி இயக்கங்கள், இத்தகைய "நூதனமான" போராட்டத்தை ஊக்குவித்து வருகின்றன. சுவீடனில் பயணச்சீட்டு இன்றி பிரயாணம் செய்பவர்களுக்காக  ஒரு சங்கம் அமைக்கப் பட்டுள்ளது. 

ஐரோப்பிய நகரங்களில், விசா எதுவுமின்றி தங்கியிருக்கும் வெளிநாட்டவர்களுக்கு உதவிக் கொண்டிருந்த இடதுசாரி ஆர்வலர்கள் தான் அந்தப் போராட்டத்தை நிறுவனமயப் படுத்தினார்கள். சட்டபூர்வ அனுமதி இல்லாத காரணத்தினால், சட்டப்படி வேலை செய்ய முடியாதவர்கள், வறுமை காரணமாக பயணச்சீட்டு இன்றி பயணம் செய்வது வழக்கம். அப்படிப் பயணம் செய்யும் பொழுது பிடிபட்டால், அதையே சாட்டாக வைத்து நாடுகடத்தி விடுவார்கள். அதனால், சுவீடிஷ் இடதுசாரிகள், சட்டபூர்வ ஆவணங்கள் இன்றி தங்கி இருப்போருக்கு, பயணச் சீட்டுகளை வாங்கிக் கொடுத்து வந்தனர். 2001 ம் ஆண்டு, சுவீடிஷ் அரசு போக்குவரத்து கட்டணங்களை உயர்த்தியது. இதனால், சாதாரண சுவீடிஷ் உழைக்கும் வர்க்க மக்களும் பாதிக்கப் பட்டனர். மக்களின் அத்தியாவசிய துறையான, பொதுப் போக்குவரத்து துறை, அநியாய கட்டணம் வசூலிக்கின்றது என்று பலர் அதிருப்தியுற்றனர். 

planka.nu  என்ற அமைப்பு, பொதுப் போக்குவரத்தில் டிக்கட் வாங்காமல் பிரயாணம் செய்வோரின் சங்கமாக உருவாக்கப்பட்டது. அந்த சங்கத்தில் யாரும் உறுப்பினராக சேரலாம். ஒவ்வொருவரும் மாதாந்தம் 100 சுவீடிஷ் குரோனர் (அண்ணளவாக 10 யூரோ) சந்தா கட்டி வர வேண்டும். நீங்கள் ஆறு மாத சந்தாவை ஒரே தடவையிலும் செலுத்த விரும்பினால் 500 Kr . (100 குரோனர் கழிவு). தற்காலிகமாக சுவீடனுக்கு வந்திருக்கும் சுற்றுலாப் பயணிகள் என்றால், வாரத்திற்கு 50 குரோனர். நீங்கள் பஸ்ஸில், ரயிலில் பரிசோதகர் பயணச் சீட்டு இன்றி பிரயாணம் செய்து, பரிசோதகரிடம் பிடிபட்டு அபராதம் கட்டினால், அந்தத் தொகையை சங்கம் பொறுப்பெடுத்து கட்டி விடும். சுவீடனில் அபராதத் தொகை 1200 குரோணர்கள் (120 யூரோ) ஆகும். 

சுவீடனில் பயணச் சீட்டு இல்லாமல் பிரயாணம் செய்வது ஒரு கிரிமினல் குற்றமல்ல. அதனால், பொலிஸ் பிரச்சினை வருவதற்கு வாய்ப்பில்லை. பொதுப் போக்குவரத்து சட்டம் நாட்டிற்கு நாடு வேறுபடுகின்றது. அதனால், சில நாடுகளில் "பயணச் சீட்டு இல்லாமல் பயணம் செய்வோர் சங்கம்" கட்டுவது, சாத்தியமிலாமல் போகலாம். இருப்பினும், பிற நாடுகளிலும் இது போன்ற சங்கம் கட்டுவது எப்படி என்ற தகவல் இணையத்தில் கிடைக்கிறது. பல நகரங்களில் மெட்ரோ, ரயில் நிலையங்கள் இலத்திரனியல் கதவுகளால் பூட்டப் பட்டிருந்தாலும், அதற்கூடாக நுழைவது எப்படி என்பதை ஒரு வீடியோ மூலம் காட்டியிருக்கிறார்கள். 

நிச்சயமாக, "பயணச் சீட்டு வாங்காமல் பயணம் செய்வோர் சங்கம்" அரசாங்கத்திற்கு  உவப்பானதல்ல. பல தடவைகள், அரச அதிகாரிகள் மிரட்டல் விடுத்து வந்துள்ளனர். ஆனால், இது வரையிலும், அந்த சங்கத்தை சேர்ந்த எவரும் கைது செய்யப் பட்டு, வழக்குத் தொடுக்கப் படவில்லை. போராட்டத்தில் மறைந்திருக்கும் நியாயத் தன்மை காரணமாக,  அவர்கள் மேல் சட்ட நடவடிக்கை எடுப்பதற்கு அரசு அஞ்சுகின்றது. இங்கே எழுதப்பட்ட தகவல்கள், சுவீடனில் கூட நிறையப் பேருக்குத் தெரியாது. அதனால், விஷயம் பெரிதாகி ஊடகங்களின் கவனத்தைப் பெற்று, நாட்டில் எல்லோருக்கும் தெரிய வைப்பதை  விட, கண்டுகொள்ளாமல் பேசாமல் இருப்பது நல்லது என்றே அரசு நினைக்கின்றது. "சுவீடனில், தனியார் வாகனப் பாவனையை குறைக்க வேண்டும். நாட்டில் கார்கள் அதிகமாகி விட்டதால், சுற்றுச் சூழல் மாசடைகின்றது. அதற்குப் பதிலாக, பொதுப் போக்குவரத்தை இலவசமாக்கினால்  இந்தப் பிரச்சினையை தீர்க்கலாம்." இவ்வாறு அந்த இடதுசாரி ஆர்வலர்கள் வலியுறுத்தி வருகின்றனர். "பொது மக்களுக்கான போக்குவரத்து இலவசமாக்கப் பட வேண்டும்" என்ற கோரிக்கையை, பெரும்பாலான மக்கள் வரவேற்கவே செய்வர். 

ஏற்கனவே, சோவியத் யூனியனிலும், முன்னாள் சோஷலிச நாடுகளிலும், பொதுப் போக்குவரத்து ஒன்றில் இலவசமாக, அல்லது மிகவும் குறைந்த கட்டணத்தில் நடத்தப் பட்டு வந்தது. பல தசாப்தங்களாக, அந்த நாடுகளில் போக்குவரத்து கட்டணம் உயரவில்லை. சுமார் பத்து வருடங்களுக்கு முன்னர், நான் வெள்ளை ரஷ்யா (சோவியத் யூனியனில் இருந்து பிரிந்த குடியரசு) வுக்கு சுற்றுலா சென்றிருந்தேன். அப்போது கூட, தலைநகரான மின்ஸ்க் நகரில், சுரங்கரயில் போக்குவரத்து கட்டணம் மிகவும் குறைவாக இருந்தது. 0 .10 டாலர் சதத்திற்கு,  நகரின் ஒரு முனையில் இருந்து மறு முனைக்கு பயணம் செய்யக் கூடியதாக இருந்தது. மின்ஸ்க் நகரின் சுற்றளவு 30 கி.மி. இருக்கலாம். இன்றைய உலகமயமாக்கப்பட்ட பொருளாதார காலத்திலேயே இப்படி என்றால், சோவியத் யூனியன் சோஷலிச நாடாக இருந்த காலத்தில், வாழ்க்கை எந்தளவு இலகுவாக இருந்திருக்கும் என்பதை நினைத்துப் பாருங்கள். இதை எல்லாம் நமது நாடுகளில் கற்பனை பண்ணக் கூட முடியாது. ஐரோப்பாவிலேயே, சுவீடன், நோர்வே போன்ற ஸ்கண்டிநேவிய நாடுகளில், பயணச் சீட்டின் விலை அதிகம். மிகவும் குறைந்தளவு பஸ் கட்டணம் 30 குரோணர்கள். 


மேலதிக தகவல்களுக்கு:
1.Planka.nu இணையத்தளம்: Free public transport  http://planka.nu/eng/ 
2.உங்கள் நாட்டிலும் "பயணச்சீட்டு வாங்காமல் பயணம் செய்வோர் சங்கம்"  அமைப்பது எப்படி? கைநூலை இங்கே தரவிறக்கிக் கொள்ளலாம்:
3.பயணச்சீட்டு இன்றி பயணம் செய்வது எப்படி என விளக்கும் வீடியோ: 

Monday, November 05, 2012

ஆதித் தமிழ் சகோதர இனம் வாழ்ந்த "அரபி கண்டம்"

நாம் கறுப்பர்! நமது மொழி தமிழ்! 
நம் தாயகம் ஆப்பிரிக்கா! - 13


(பதின்மூன்றாம் பாகம்)

புராதன குகைக் கோயில்கள்: 1.பெட்ரா (ஜோர்டான்), 2.எல்லோரா (மத்திய இந்தியா), 3.மாமல்லபுரம் (தமிழ் நாடு)
இஸ்லாம் என்ற மதம் தோன்றுவதற்கு பல நூறாண்டுகளுக்கு முன்னரே, அதாவது கி.மு. 3 ம்  நூற்றாண்டில் இருந்து, தமிழர்களுக்கும் அரேபியர்களுக்கும் இடையில் சிறந்த வர்த்தகத் தொடர்பு இருந்தது. ஒமானிலும், எகிப்திலும் கண்டெடுக்கப் பட்ட தமிழ் எழுத்துக்கள் பொறித்த மட்பாண்டங்கள், இதனை உறுதிப் படுத்துகின்றன. (Potsherd with Tamil-Brahmi script found in Oman, http://www.thehindu.com/news/national/potsherd-with-tamilbrahmi-script-found-in-oman/article4038866.ece) இந்து சமுத்திரத்தின் ஊடாக, இரண்டு சமூகங்களும் தமது கலாச்சாரங்களை பரிமாறிக் கொண்டன. இரு நாடுகளின் பொருளாதாரங்களில் மட்டுமல்ல, மொழி, மத நம்பிக்கை ஆகியவற்றில் கூட, ஒன்றின் மேல் மற்றது செல்வாக்கு செலுத்தியது. அது, இரண்டு சகோதர இனங்களுக்கு இடையிலான நட்புறவாக இருந்தது. யாரும் யாரையும் ஆக்கிரமிக்கவில்லை.  

இருபது வருடங்களுக்கு முன்னர், இன்றைய ஓமானின் தென் பகுதி பாலைவன மணலுக்குள் புதையுண்டிருந்த நகரம் ஒன்று கண்டுபிடிக்கப் பட்டது. (Atlantis of the Sands, http://en.wikipedia.org/wiki/Atlantis_of_the_Sands) ஒரு காலத்தில் செல்வச் செழிப்பில் சிறந்து விளங்கிய "உபார்" (Ubar) என்ற பண்டைய நகரம் பற்றிய விபரங்கள், குர்ஆனில் மட்டுமே குறிப்பிடப் பட்டிருந்தன. (குர்ஆனில் "இராம்" என்று குறிப்பிடப் பட்டது.) பாலைவனத்தில் புதைந்திருந்த உபார், நாசாவின் செய்மதிப் படங்களின் மூலம், தற்செயலாக கண்டுபிடிக்கப்பட்டது. வானுயர்ந்த கோபுரங்களைக் கொண்ட நகரம் ஒன்றின் அழிவு பற்றிய கர்ண பரம்பரைக் கதை ஒன்று, அந்த இடத்தில் வாழ்ந்த மக்களிடையே பேசப் பட்டு வந்தது.  ஆதி காலத்தில் வாழ்ந்த, 12 அரேபியப் பழங்குடி இனங்களில் ஒன்றான, "ஆத்" (தமிழில்: ஆதி?)   என்ற பெயரைக் கொண்ட மக்களின் நாடு என்று, குரானில்  குறிப்பிடப் பட்டிருந்தது. "வானுயர கோபுரங்களை கட்டிய ஆத் மக்களும், குகைக் கோயில்களை கட்டிய தம்மூட் மக்களும், அல்லாவை ஒரே இறைவனாக வழிபட மறுத்ததால் அழிக்கப் பட்டனர்."  என்று குரான் கூறுகின்றது. குரான் ஒரு மத நூல் என்பதால், இயற்கை அழிவுக்கு இறைவனை தொடர்பு படுத்திப் பேசுவது எதிர்பார்க்கத் தக்கதே. பல நாட்களாக வீசிய பாலைவனப் புயலினால், உபார் நகரையும், மக்களையும் மணல் மூடியது என்று குர்ஆனில் எழுதப் பட்டுள்ளது. சுனாமி என்ற கடல் பேரலலைகள் அழித்த, தமிழகத்தின் பூம்புகார் நகரம் போன்று, உபார் நகரமும் இயற்கைப் பேரழிவினால் பாதிக்கப் பட்டது.   

உபார் (இராம்) தேச மக்கள், ஆயிரம் தூண்களைக் கொண்ட கட்டிடங்களை கட்டியதாக, குரான் தெரிவிக்கின்றது. ("யாருமே உருவாக்கியிராத மகிமை பொருந்திய தூண்களைக் கொண்ட இராம்....."திருக்குர்ஆன், Sura Al Fajr, 6:14)  தமிழகத்தில் இராமேஸ்வரம் (இராம்+ஈஸ்வரம்) கோயிலும், மதுரை மீனாட்சி அம்மன் கோயிலும்,  இலங்கையில்   அனுராதபுரத்தில் உள்ள ஆயிரம் கால் மண்டபமும், இதே போன்று பல நூறு தூண்களைக் கொண்டு கட்டப் பட்ட உலக அதிசயங்கள் தாம். இராமேஸ்வரம் கோயில் கழட்டிய தமிழ்-திராவிடர்களும், அனுராதபுரத்தில் விகாரை கட்டிய சிங்கள-திராவிடர்களும், உபார் கோயிலைக் கட்டிய அரபு-திராவிடர்களும் ஒரே இனத்தை சேர்ந்த, ஒரு தாய் மக்கள் தான். அதனால் தான், உலகில் வேறெந்த இனமும் அறிந்திராத, பிரமாண்டமான கட்டிடங்களை கட்டும் தொழில்நுட்ப அறிவை பெற்றிருந்தனர். குரான் இன்னொரு நாகரீகமடைத்த இனத்தின் பெயரையும் குறிப்பிடுகின்றது. அரேபியாவில் வாழ்ந்த தம்முத் மக்கள், மலைப் பாறைகளை  குடைந்து அழகிய கோயில்களை கட்டுவதில் வல்லவர்கள். ("திறந்த வெளிகளில் மாளிகைகளையும், கோட்டைகளையும் கட்டினீர்கள். மலைகளைக் குடைந்து வீடுகளைக் கட்டினீர்கள்." -திருக்குர்ஆன், sura, Al-A'raf 7:74) அவர்களின் குகைக் கோயில் கட்டும் திறமைக்கு சாட்சியமாக, ஜோர்டானில் பேட்ரா, சவூதி அரேபியாவில் மடாயின் சலே,  மத்திய இந்தியாவில் அஜந்தா, எல்லோரா, மற்றும் தமிழ் நாட்டில் மாமல்லபுரம் ஆகிய இடங்கள் சான்று பகர்கின்றன.  இவை எல்லாம் ஒரே மாதிரியான கலை நேர்த்தியுடன் செதுக்கப் பட்டுள்ளதை, இன்றைக்கும் பார்த்து இரசிக்கலாம். 

தமிழ் என்ற பெயர்ச்சொல், அந்நியரால் சூட்டப்பட்டது. அதன் மூலம் அரேபியாவில் இருந்து வந்திருக்கலாம் என்பதை பற்றி ஏற்கனவே எழுதி இருக்கிறேன். (பார்க்க: சிரியாவில் தமிழுக்கு தம்முழ் என்றும் பெயர்) குர்ஆனில் குறிப்பிடப் படும் தம்முட் என்ற இனத்தின் பெயர் மருவி,  தமிழர் என்று வந்திருக்கலாம். ஆனால், அதற்கான  ஆதாரம் எதுவும் கிடையாது.    எல்லாமே ஒன்றோடொன்று தொடர்பு கொண்டிருந்தன என்பது மட்டும் தெளிவானது. குரான் குறிப்பிடும் தம்முட் மக்கள், மூவாயிரம் வருடங்களுக்கு முன்னர் வாழ்ந்து, வரலாற்றில் இருந்து மறைந்து விட்டனர்.  ஜோர்டானில் பேட்ரா நகரக் கோயில்களைக் கட்டிய நபெத்தியர்களும், தம்முட் என்ற பெயரில் குறிப்பிடப் பட்டிருக்கலாம்.  ஏனெனில், குர்ஆனில் எழுதப்பட்ட குறிப்புகள், நபெத்திய நாகரீகத்துடன் பொருந்துகின்றன.  (தம்முத் அல்லது நபெத்தியர்கள், இதில் எந்தச் சொல், அந்த மக்களின் உண்மையான பெயரைக் குறிக்கின்றது என்று தெரியவில்லை.)  

ஒரு காலத்தில், தென் அரேபியப் பகுதி, மேற்கு ஆப்பிரிக்காவுடன் ஒரே நிலப்பகுதியாக சேர்ந்திருந்திருக்க வேண்டும். அதாவது, இன்றைய சோமாலியாவும், யேமனும் ஒன்றாக இணைந்திருந்தன. அப்போது ஆப்பிரிக்க கறுப்பின மக்கள், அரேபிய தீபகற்பத்தில் குடியேறி வாழ்ந்திருக்கலாம். இன்றைக்கும், சோமாலிய மக்களுக்கும், யேமன் மக்களுக்கும் இடையில், அதிசயப் படத் தக்க ஒற்றுமைகள் காணப்படுகின்றன. தோற்றத்தில், தோல் நிறத்தில் உள்ள ஒற்றுமை முக்கியமானது. அடுத்ததாக, சடங்கு, சம்பிரதாயம், பண்பாடு, உணவுப் பழக்கம் என்பன ஒரே மாதிரியாக உள்ளன. மூன்றாவதாகவும் ஒன்றைக் குறிப்பிடலாம். உலகில் வேறெந்த அரபு நாட்டிலும் இல்லாத சாதி அமைப்பு முறை யேமனில் மட்டுமே உள்ளது. அதே போன்று, முழு ஆப்பிரிக்க கண்டத்திலும், சோமாலியாவில் மட்டுமே சாதி ஒரு முக்கியமான சமூகப் பிரிவாக உள்ளது. இந்திய உப கண்டமும், சாதிப் பிரிவினைகளுக்கு பேர் போனது, என்பதை நான் இங்கே குறிப்பிடத் தேவையில்லை. இந்தியர்களும் (குறிப்பாக தென்னிந்தியர்கள்), சோமாலியர்களும், யேமானியர்களும் ஆதியில் ஒரே இனத்தை சேர்ந்தவர்களாக இருந்திருக்க வேண்டும்.  இவர்களுக்கு இடையில் வேறென்ன ஒற்றுமைகள் உள்ளன என்பதைப் பார்ப்போம். 

அரேபியரிலும், யேமன்  நாட்டவர்கள் தான், எம்மைப் போல மூன்று வேளையும் சோற்றை விரும்பி உண்பார்கள். அரபி மொழியில் அதன் பெயர் அரூஸ், சோமாலிய மொழியிலும் அரூஸ் தான். தமிழில் நாங்கள் அரிசி என்று சொல்வோம். அரிசியில் செய்யப்படும் உணவு வகையான பிரியாணியை (ஒரே பெயர்), சோமாலியா, யேமன், ஓமான் ஆகிய நாடுகளில் பிரதான உணவாக விரும்பி உண்பார்கள். சாப்பிட்ட பின்னர் வெற்றிலை போடும் வழக்கம் பற்றி, ஏற்கனவே ஒரு தடவை எழுதி இருக்கிறேன். இந்த மென்மையான போதைவஸ்துக்கு அடிமையாவது, யேமன், சோமாலியாவில் ஒரு கலாச்சாரமாகவே மாறிவிட்டது. உணவில் மட்டுமல்ல, உடையில் கூட ஒற்றுமை உண்டு.  இடுப்பை சுற்றி உடுக்கும் சாரம் (லுங்கி, கைலி) என்ற ஆடையை, ஆண்கள் எல்லோரும் அணிந்து கொள்வார்கள். தினசரி மஞ்சள் பூசிக் குளிக்கும் வழக்கம், சோமாலிய, தெனிந்திய, யேமன் பெண்கள் மத்தியில் பிரபலமானது. இப்படிப் பல கலாச்சார ஒற்றுமைகளை அடுக்கிக் கொண்டே போகலாம்.


மூவாயிரம் வருடங்களுக்கு முன்னரே, இந்தியாவுக்கும், அரேபியாவுக்கும்  இடையில் வர்த்தகத் தொடர்பு இருந்தது. அந்தக் காலத்தில், அரேபியர்கள் இந்தியாவிலும், இந்தியர்கள் அரேபியாவிலும் சென்று குடியேறினார்கள். இது ஈழத்திற்கும், தமிழகத்திற்கும் இடையிலான பண்பாட்டுத் தொடர்பைப் போன்றது. அதற்கு ஆதாரமாக, இந்து சமுத்திரத்தில் உள்ள  சொகொத்ரா தீவை (Socotra Island)   குறிப்பிடலாம். இன்று யேமனுக்கு சொந்தமான தீவில், இன்றைக்கும் அங்கே இந்திய, அரேபிய, ஆப்பிரிக்க கலாச்சாரங்கள் ஒன்று சேர்வதைக் காணலாம். தீவு மக்கள், "சொகொத்ரி மொழி"  என்ற தனியான மொழி ஒன்றைப் பேசுகின்றனர். அது அரபி மொழியின் கிளை மொழி அல்ல!  கேந்திர முக்கியத்துவம் வாய்ந்த இடத்தில் இருப்பதால், ஒரு காலத்தில் சிங்கப்பூர் போன்று பணக்காரத் தீவாக இருந்தது. இன்று அங்கே, அமெரிக்க இராணுவம் தளம் அமைத்துள்ளது.

சொகொத்ரா  தீவின் பூர்வீகப் பெயர், "சுகாதார தீபம்"! அதன் மூலம் சமஸ்கிருதமா அல்லது தமிழா என்பது எனக்குத் தெரியாது. எது எப்படி இருந்தாலும், தமிழர்களின் அல்லது இந்தியர்களின் மூதாதையருக்கு, அரேபியாவுடன் நெருங்கிய தொடர்பிருந்ததை இது எடுத்துக் காட்டுகின்றது. ஓமானில், ராப் அல் காலி பாலைவனத்தில் கண்டுபிடிக்கப் பட்ட புராதன நகரான உபார் (இராம்) கூட, இந்தியாவுடனான வர்த்தகத் தொடர்பினால் தான், ஒரு பணக்கார நாடாக திகழ்ந்தது. இன்றைக்கு இருக்கும் உலக ஒழுங்கிற்கு முற்றிலும் மாறுபாடான ஒரு உலகம் அன்றிருந்தது. இன்று நியூ யார்க், லண்டன், டோக்கியோ ஆகிய நகரங்கள் சர்வதேச வர்த்தகத்தை கட்டுப் படுத்துவதைப் போல, அன்று பல வர்த்தக நகரங்கள் மத்திய கிழக்கிலும், இந்தியாவிலும் இருந்துள்ளன. இவற்றிற்கு இடையிலான நெருங்கிய வர்த்தகத் தொடர்பு காரணமாக, உலகிலேயே அதிகளவு பணம் புரளும் செல்வந்த நகரங்களாக இருந்தன. 

தொன்மையான உபார் நகரம் போன்று, சிரியாவிலும் மறைந்த நகரம் ஒன்று கண்டுபிடிக்கப் பட்டது. எப்லா (Ebla) என்ற பெயரைக் கொண்ட நகரம், ஒரு தனி நாடாக விளங்கியது. உபாருக்கும், எப்லாவுக்கும் இடையில் நெருங்கிய வர்த்தகத் தொடர்பிருந்தது. எப்லா நாட்டின் நிர்வாகத்தையும், வணிகத் தொடர்புகளையும் குறிப்பிடும் களிமண்  தட்டுகள் அகழ்வாராய்ச்சியில் கண்டுபிடிக்கப் பட்டன. எப்லா அகழ்வாராய்ச்சியில் கண்டெடுக்கப்பட்ட களிமண் தட்டுகள், பாபிலோனிய மொழியிலும், அந் நாட்டு மக்கள் பேசிய எப்லா மொழியிலும் எழுதப் பட்டிருந்தன. நவீன செமிட்டிக் மொழிகளான ஹீபுரு, அரமைக், அரபி ஆகிய மொழிகள் தோன்றுவதற்கு, ஆயிரம் வருடங்களுக்கு முன்னரே, எப்லா மொழி பேசப்பட்டது. அதுவே நவீன செமிட்டிக் மொழிகளின் தாயாக இருந்திருக்கலாம்.  சிரியாவில் பிற்காலத்தில் தோன்றிய கானான் நாட்டு மக்கள், எப்லா தேசத்தவர் பயன்படுத்திய எழுத்துக்களை மேலும் மெருகூட்டினார்கள். அதுவே தமிழ், சமஸ்கிருதம், கிரேக்கம், ஹீபுரு, அரபி எல்லாவற்றிற்கும் அடிப்படையான அரிச்சுவடி ஆகும். சிரியாவில், லடாக்கியா நகருக்கு அருகாமையில் உள்ள உகாரிட் (Ugarit) என்ற பண்டைய நகரின் இடிபாடுகளை சென்று பார்க்கும் சந்தர்ப்பம் கிடைத்தால், இது பற்றி நீங்கள் விரிவாக அறிந்து கொள்ளலாம். 

ஹீபுரு, அரபி ஆகிய செமிட்டிக் மொழிகளில் நிறைய தமிழ்ச் சொற்கள் கலந்துள்ளன. சாலமன் மன்னன் ஆண்ட இஸ்ரேலுக்கும்,  தமிழகத்தில்  பாண்டிய நாட்டிற்கும் இடையில் வர்த்தகத் தொடர்பிருந்தது. இதனை சிலப்பதிகாரமும் பதிவு செய்துள்ளது.  அன்றைய தமிழகத்தில், அரேபியர், ஹீபுருக்கள், கிரேக்கர்கள் எல்லோரும் "யவனர்கள்"  என்றே அழைக்கப் பட்டனர். யூதர்களின் விவிலிய நூலில், "ஆகாஸ்வரோஷ்" என்ற மன்னனின் சாம்ராஜ்யம் பற்றிய குறிப்பொன்று காணப்படுகின்றது. ஆகாஸ்வரோஷின் சாம்ராஜ்யம், எத்தியோப்பியாவில் இருந்து இந்தியா வரை  வியாபித்திருந்தது. (Ahasuerus, a Persian king, identical with Xerxes (486-465 B.C.). The Book of Esther deals only with one period of his reign. It tells us that he ruled over one hundred and twenty-seven provinces—"from India, even unto Ethiopia" (Esth. i. 1);  http://www.jewishencyclopedia.com/articles/967-ahasuerus )   உலகின் பெரும்பாலான பகுதிகளில், நாகரீகத்தின் அறிகுறியே தோன்றியிராத காலத்தில், எத்தியோப்பியா தொடக்கம் தென்னிந்தியா வரையிலான பகுதிகள், அதி உன்னத நாகரிக வளர்ச்சி கண்டிருந்தன. அதனை நிரூபிப்பதற்கு, மேற்குறிப்பிட்ட தரவுகள் போதுமானவை.    

கி.மு. 5000 வருடங்களுக்கு முன்னரே, ஆப்பிரிக்க-எத்தியோப்பியர்கள்  தென் அரேபியாவில் ஒரு சாம்ராஜ்யத்தை உருவாக்கி இருந்தனர். அங்கே அவர்கள் பேசிய மொழிகள், இன்று பழைய அரபு மொழி என்ற பெயரில், குறிப்பிட்ட பிரதேசங்களில் மட்டுமே பேசப்படும் வட்டார மொழிகளாக சுருங்கி விட்டன. மிகவும் தொன்மையான அரேபியர்கள் என்று கருதப்படும் யேமனியர்கள், இன்றுள்ள அரபி எழுத்துக்களை பயன்படுத்தி எழுதவில்லை. வித்தியாசமான எழுத்து வடிவம் ஒன்றைக் கொண்டிருந்தனர். கி.மு. 3 ம்  நூற்றாண்டில் உருவான தமிழ் எழுத்துக்களும், கி.மு. 9 ம் நூற்றாண்டில் உருவான யேமன்  அரபி எழுத்துக்களும் பார்ப்பதற்கு ஒரே மாதிரியாக இருப்பது ஒன்றும் தற்செயல் அல்ல. கி.மு. 1000 ம்  ஆண்டளவில், லெபனான் அல்லது சிரியாவை சேர்ந்த  பீனிசியர்கள் அல்லது கானானியர்கள் பயன்படுத்திய எழுத்துக்கள் தான், கிரேக்கர்களாலும், பிற ஐரோப்பிய மொழிகளாலும் கடன்வாங்கப் பட்டன.

"எமது இனத்தவர்கள் மட்டுமே, ஒரு காலத்தில் உலகம் முழுவதும் ஆண்டார்கள்..."  என்று கூறுவது மடமைத்தனம். அது மட்டுமல்ல, சகோதர இனத்தவர் மத்தியில் வெறுப்பையும் தோற்றுவிக்கும். மொழி என்பது காலத்திற்கு காலம் மாறக் கூடியது. இரண்டாயிரம் வருடங்களுக்கு முந்திய தமிழைப் பேசும் மக்கள் கூட்டம் ஒன்று, இன்றைக்கும் எம் மத்தியில் வாழ்ந்து வந்தால், அவர்களை வேற்றினமாக கருதி ஒதுக்கி வைத்திருப்போம். ஏனெனில், இரண்டாயிரம் வருடங்களுக்கு முன்னர் பேசப்பட்ட தமிழில் ஒரு சொல் கூட எங்களுக்குப் புரியாது. மேலும், ஒரு மொழியைப் பேசுவதால், அந்த மக்களை தனியான இனமாக கருதுவது தவறானது. எத்தியோப்பியர்கள், யேமனியர்கள், அரேபியர்கள், ஹீபுருக்கள், தமிழர்கள் ஆகியோர், ஆதி காலத்தில் ஒரே இனத்தை சேர்ந்த மக்கள் தான். ஆனால், காலப்போக்கில் பிற இனங்களுடன் கலந்து, இன்றைய பிரிவினைகள் தோன்றின. மத நம்பிக்கைகள் மட்டுமல்ல, மொழிகள், அரிச்சுவடிகள், கலாச்சாரங்கள் எல்லாவற்றையும், உலக மக்கள் ஒருவரிடம் இருந்து மற்றவர் கற்றுக் கொண்டுள்ளனர்.

எத்தியோப்பியர்கள் அல்லது சோமாலியர்கள், யேமனில் அரேபியர்களாக மாறினார்கள். அங்கே அவர்கள் சபா (Sabaen) நாகரீகத்தை உருவாக்கினார்கள். வடக்கு நோக்கி குடிபெயர்ந்தவர்கள், பாலஸ்தீனம், ஜோர்டான், வட சவூதி அரேபியா  ஆகிய இடங்களில் நபெத்திய நாகரீகத்தை உருவாக்கினார்கள். இரண்டாயிரம் வருடங்களுக்கு முன்னர், யேமனில் இருந்து இன்னொரு பிரிவினர் ஈராக் நோக்கி குடிபெயர்ந்து சென்றனர். பானு லக்கும் என்ற இனக்குழுத் தலைவனின் தலைமையில், மெசப்பத்தொமியாவில் லக்மிடிய ராஜ்யத்தை உருவாக்கினார்கள். அது ஒரு கிறிஸ்தவ ராஜ்யமாக இருந்தது. அந்த கிறிஸ்தவ நாடு, மேற்கே கிரேக்க-ரோம சாம்ராஜ்யத்திற்கும் கிழக்கே பாரசீக சாம்ராஜ்யத்திற்கும் இடையில் நடுநிலை வகித்தது.

பாரசீகர்கள் லக்மிடியர்களின் ராஜ்யத்திற்கு, "அராபிஸ்தான்"  என்று பெயரிட்டு அழைத்தனர். கிரேக்கர்கள், இன்றைய அரேபிய தீபகற்பம் முழுவதையும், "அரேபியா பெலிக்ஸ்"  என்று அழைத்தனர். பிந்திய வரலாற்றில் அரேபியா என்ற பெயர் நிலைத்து விட்டது. அதனால், அரேபியர்கள் என்பது ஒரு குறிப்பிட்ட இனத்தைக் குறிக்கும் சொல்லாக  நாங்கள்  கருத முடியாது. தற்செயலாக அந்தப் பிரதேசத்தில் தங்கி வாழ நேர்ந்து விட்ட அனைவரும், பிற்காலத்தில் அரேபியர்களாகி விட்டார்கள். அவர்கள் வெள்ளையின கிரேக்கர்களாக இருந்தாலும், அரேபியர்கள் என்றே அழைக்கப் பட்டனர். ஆகவே, அரேபியர்களும், தமிழர்களும், எந்த வித தொடர்புமற்ற வெவ்வேறு இனங்கள் என்று நினைப்பது, எமது அறியாமையின் வெளிப்பாடாகும்.


(தொடரும்)


இந்தத் தொடரின் முன்னைய பதிவுகளை வாசிப்பதற்கு:

1.நாம் கறுப்பர்! நமது மொழி தமிழ்! நம் தாயகம் ஆப்பிரிக்கா!
2.பண்டைய எகிப்தின் பத்தினித் தெய்வம்: கண்ணகி அம்மன்
3.சோமாலியர்கள்: தமிழர்களின் மூதாதையர்கள்
4.தமிழர்கள் தொலைத்த ஆப்பிரிக்கக் கடவுள்
5.கோயிலில் பாலியல் தொழில்
6.ஈராக்கில் தோன்றிய தமிழரின் நாகரீகம்
7.ஆடியில் உயிர்த்தெழுந்த, திராவிடர்களின் "கறுப்பு இயேசு!"
8.வேல் முருகன் குடியிருந்த பாக்தாத் நகரம்
9.சிரியாவில் தமிழுக்கு "தம்முழ்" என்றும் பெயர் !
10.கோபுரங்கள் கட்டுவது, ஆண்டவருக்கு விரோதமானது!
11.சிவபெருமான்: ஈராக்கை ஆண்ட கறுப்பின அரசன்?
12.அரபு நாட்டவர்க்கும் இறைவனான சிவனே போற்றி!


  உசாத்துணை நூல்கள்:
1. From Babylon to Timbuktu, by Rudolph R.Windsor
2. Serpent of the Nile, Women and Dance in the Arab World, by Wendy Buonaventura
3. Myths, Dreams and Mysteries: The Encounter Between Contemporary Faiths and Archaic Realities, by Mircea Eliade
4. Myths of Babylonia and Assyria, by Donald A. Mackenzie
5. Mythology, by C. Scott Littleton
6. Babylon, De Echte Stad en de Mythe, by Tom Boily
7. Civilisation One, by Christopher Knight and Alan Butler
8. Persian Myths, by Vesta Sarkhosh Curtis
9. Precolonial Black Africa, by Cheikh Anta Diop
10. Black Arabia & The African Origin of Islam, by Dr. Wesley Muhammad
11. Kusha-Dwipa: The Kushites of Asia, by Dr. Clyde Winters

Friday, November 02, 2012

அரபு நாட்டவர்க்கும் இறைவனான சிவனே போற்றி!

நாம் கறுப்பர்! நமது மொழி தமிழ்!
 நம் தாயகம் ஆப்பிரிக்கா! - 12  

(பன்னிரண்டாம்  பாகம்)

"யாக்கோபு பெயேர்செபாவிலிருந்து புறப்பட்டு, கரானை நோக்கிச் சென்றான். அவன் ஓரிடத்திற்கு வந்தபோது கதிரவன் மறைந்துவிட்டான். எனவே அங்கே இரவைக் கழிப்பதற்காக அவ்விடத்தில் கிடந்த கற்களில் ஒன்றை எடுத்துத் தலைக்கு வைத்துக் கொண்டு, அங்கேயே படுத்துறங்கினான். அப்போது அவன் கண்ட கனவு இதுவே; நிலத்தில் ஊன்றியிருந்த ஓர் ஏணியின் நுனி மேலே வானத்தைத் தொட்டுக் கொண்டு இருந்தது. அதில் கடவுளின் தூதர் ஏறுவதும் இறங்குவதுமாய் இருந்தனர். யாக்கோபு தூக்கம் தெளிந்து, "உண்மையாகவே ஆண்டவர் இவ்விடத்தில் இருக்கிறார்; நானோ இதை அறியாதிருந்தேன்" என்று அச்சமடைந்து, "இந்த இடம் எவ்வளவு அச்சத்திற்குரியது! இதுவே இறைவனின் இல்லம், விண்ணுலகின் வாயில்" என்றார். பிறகு யாக்கோபு அதிகாலையில் எழுந்து, தலைக்கு வைத்திருந்த கல்லை எடுத்து, நினைவுத் தூணாக அதை நாட்டி, அதன் மேல் எண்ணெய் வார்த்து, "Luz" என்று வழங்கிய அந்த நகருக்குப் "பெத்தேல்(Bethel)" என்று பெயரிட்டார்." -  விவிலியம், ஆதியாகமம் (28:11-19)

"சிவன்", "சைவர்கள்" என்ற சொற்பதங்கள் எங்கே தோன்றின?  எமது அறிவுக்கெட்டிய தூரத்தில், இந்திய உபகண்டத்தில் அந்தச் சொற்களுக்கான மூலத்தை கண்டுபிடிக்க முடியவில்லை. நாங்கள் பிழையான இடத்தில் தேடினால் கிடைக்குமா? சிவ வழிபாடு, ஆதி தமிழர்களுக்கு உரிய சிறப்பம்சம் என்று பல தமிழ் அறிஞர்கள் கூறி வருகின்றனர். அப்படியானால், ஆதித் தமிழர்கள் வாழ்ந்த, அரபு நாடுகளிலும் சிவ வழிபாடு இருந்திருக்க வேண்டுமல்லவா? ஆச்சரியப் படத் தக்கவாறு, பல அரபு நாடுகளில் "சிவா" என்ற பெயரிலான இடங்கள் பலவுள்ளன. எகிப்தில் உள்ள "சிவா" பாலைவனச் சோலையில், வருங்காலத்தில் நடக்கப் போவதை அறிவிக்கும் தேவதை இருப்பதாக நம்பப் பட்டது. இன்றைய இஸ்ரேலில், சிவதா (Shivta), டெல் சிவா (Tel Sheva) என்ற பெயரிலான இடங்கள், நாகேவ் பாலைவனப் பிரதேசத்தில் உள்ளன. பண்டைய நாகாரீக காலத்திய நபெத்திய மக்கள் கட்டிய நகரங்கள் அவை.  ஹீபுரு மொழியில், ஆனி மாதத்திற்கு சிவன் என்று பெயர்!  அரேபியரின் பூர்வீகம், ஐந்தாயிரம் வருடங்களுக்கு முன்னமே நாகரிக வளர்ச்சி கண்ட யேமனில் உள்ளது. அன்று அது, ஷீபா நாகரீகம் என்று அழைக்கப் பட்டது. "ஷீபா" என்பது ஆங்கில உச்சரிப்பு. ஹீபுரு மொழியில், "ஷ்' வா". அரபு மொழியில் "சபா" (Saba). சபா என்ற சொல் மருவி, தமிழில் "சைவா" என்று மாறியிருக்குமா?  "B" உச்சரிப்பு கொண்ட சொற்கள், தமிழில் "வ" என்று மாறுவது பற்றி, ஏற்கனவே குறிப்பிட்டிருக்கிறேன்.   

சிவலிங்க வழிபாடு, "இந்தியாவை சேர்ந்த இந்துக்களுக்கே உரியது"  என்று நாங்கள் நினைத்துக் கொண்டிருக்கிறோம். சிவலிங்கத்தை கடவுளாக காணும் இந்துக்களும், அதனை "ஆண்குறித் தெய்வம்" என்று பரிகாசம் செய்யும் பிற மதத்தவரும் ஒரு உண்மையை அறியாமல் இருக்கின்றனர். அது ஒரு மத நம்பிக்கை என்பதற்கு அப்பால், ஆதி கால ஆப்பிரிக்க-திராவிடர்களின் பிரபஞ்சம் பற்றிய அறிவியலை எடுத்துக் காட்டுகின்றது. இந்தியாவிலும் இலங்கையிலும், சிவலிங்கத்தை மூல மூர்த்தியாக கொண்ட கோயில்களில், அது "சுயம்பு லிங்கம்"  என்று அழைக்கப் படுகின்றது. "சுயம்பு லிங்கம்", அல்லது "தான்தோன்றீஸ்வரர்" என்று ஏன் சொல்கிறார்கள்? மத நம்பிக்கை கொண்ட இந்துக்கள், "கடவுள் அந்த இடத்தில் தானாகவே தோன்றினார்."  என்று விளக்கம் கொடுக்கலாம். இன்றைக்கு அறிவியல் வளர்ந்து விட்ட உலகில், அதற்குப் பொருத்தமான காரணம் என்னவாக இருக்கும்?  

அரேபியாவில், முஸ்லிம்கள் புனித யாத்திரை செல்லும் மக்கா (மெக்கா என்பது ஆங்கில உச்சரிப்பு ) நகரில் உள்ள காபாவின்  உள்ளே, தெய்வச் சிலைகள் வைக்கப் பட்டுள்ளதாக சிலர் கூறுகின்றனர். இல்லை, அது ஒரு பூமியில் விழுந்த விண்வெளிக் கல் என்றும் நம்பப் படுகின்றது.  அதை எல்லாம் ஆராய்வது, இன்றைய நிலையில் சாத்தியமில்லாத விடயம் என்றாலும், ஒன்று மட்டும் உறுதியாகத் தெரிகின்றது. மக்கா நகரமும், அங்குள்ள காபா வழிபாடும் இஸ்லாத்திற்கு முந்தியது. பல்லாயிரம் வருடங்கள் பழமையானது. வரலாறு எழுதப்படாத காலத்தில் இருந்தே, அங்கு விழுந்த விண்வெளிக் கல்லும், அதைச் சுற்றி எழுப்பப் பட்ட கோயிலும் மக்களால் வழிபடப் பட்டு வந்திருக்க வேண்டும்.

ஆதி கால மனிதன், இடியை, மின்னலை கண்டு அஞ்சியதால், கடவுள் நம்பிக்கை தோன்றியது. அதிலே நாங்கள் இந்த விண்வெளிக் கல்லையும் சேர்த்துக் கொள்ளலாம்.  அந்தக் கற்கள், அண்டவெளியில் வெடித்துச் சிதறிய நட்சத்திரம் ஒன்றின் துண்டுகளாக இருக்க வேண்டும். அண்டவெளியில் நட்சத்திரங்களுக்கிடையில் மோதல்களும், வெடிப்புகளும் ஏற்படுவதாக விஞ்ஞானமும் கூறுகின்றது. அவ்வாறு வெடித்து சிதறி, பூமியில் வந்து விழுந்த துண்டுகளை, ஆதி மனிதன் கடவுளாக கருதி வழிபட்டு வந்திருக்கலாம். ஒருவேளை, நோய்களை குணப்படுத்தும் அதிசய சக்தி கூட அந்தக் கல்லுக்கு இருந்திருக்கலாம். பகைமை பாராட்டும் குழுக்கள், அந்தக் கல்லுக்கு அருகில் சென்று சமரசம் செய்து கொள்வது, பண்டைய அரேபியரின் சம்பிரதாயமாக இருந்தது. 

அண்டவெளியில் வெடித்து சிதறிய துகள்களில், ஒன்றேயொன்று மட்டுமே நமது பூமியில், அதுவும் மக்காவில் வந்து விழுந்திருக்குமா? உலகில் நாகரீகம் சமுதாயம் தோன்றுவதற்கு பல ஆயிரம் ஆண்டுகளுக்கு முன்னர், பூமிக்கு அருகில் வெடித்த நட்சத்திரம் ஒன்றின் துண்டுகள் உலகின் பல பாகங்களிலும் விழுந்திருக்கின்றன. ஒரு கல்லை வைத்து, கடவுள் என்று வழிபடும் முறை அதிலிருந்து தோன்றி இருக்கலாம். அதுவே சிவலிங்க வழிபாட்டின் தோற்றமாகவும் மாறி இருக்கலாம். அது, மனித வடிவில் கடவுள் சிலைகளை அமைப்பதற்கு முந்திய, மிகவும் பழமையான வழிபாடாகவும் இருக்கலாம். சைவ சமய நம்பிக்கையாளர்கள், தான்தோன்றீஸ்வரர், சுயம்பு லிங்கம் என்று அழைப்பது கூட, மண்ணில் விழுந்த விண்வெளிக் கற்களாக இருக்க வேண்டும்.

மத்திய கிழக்கில் யூத, கிறிஸ்தவ மதங்கள் தோன்றுவதற்கு முன்னர், விவிலிய நூலில் "பெத்தெல்" என்ற கல்லை கடவுளாக வழிபடும் முறை இருந்தது பற்றி, விவிலிய நூலில் குறிப்பிடப் பட்டுள்ளது. (ஆதியாகம், 28:11-19) யாகோபு கடவுளாக நம்பிய கல்லுக்கு, எண்ணை வார்த்து வழிபட்டதாக கூறுகின்றது. அர்ச்சர்கர்கள் சிவலிங்கத்திற்கு அபிஷேகம் செய்வதை, இன்றைக்கும் நீங்கள் சிவன் கோயில்களில் காணலாம். பண்டைய காலத்து மக்கள், தெய்வச் சிலைக்கு பாலால் மட்டும் அபிஷேகம் செய்யவில்லை. ஆடு, கோழி போன்றவற்றை வெட்டி, அவற்றின் இரத்தத்தை கல்லின் மேல் ஊற்றியும் அபிஷேகம் செய்தனர். மிருகங்களை பலிகொடுக்கும் வழக்கம் இன்றைக்கும் இந்தியாவிலும், இலங்கையிலும் "சிறுதெய்வ வழிபாடு", அல்லது "நாட்டார் வழிபாடு"  என்ற பெயரில் பின்பற்றப் படுகின்றது. இஸ்லாத்திற்கு முந்திய அரேபியாவில் வாழ்ந்த மக்களும், தெய்வமாக கருதி வழிபட்ட கல்லுக்கு, மிருகங்களை பலிகொடுத்து வந்தனர். இன்றைய அரேபியரின் மூதாதையரான நபெத்தியர்களும், அது போன்ற வழிபாட்டை கடைப்பிடித்து வந்தனர். 

புராதன அரேபியாவில், முக்கோண வடிவிலமைந்த கல்லை வைத்து வழிபட்டு வந்தனர். இந்தியாவிலும், இலங்கையிலும் குறிப்பாக கிராமங்களில் வாழும், தாழ்த்தப்பட்ட சமூகங்களை சேர்ந்தவர்கள், இன்றைக்கும் முக்கோண வடிவிலமைந்த கல்லை வைத்து, அதற்கு படையல் செய்து வைத்து வழிபடுவதை வழக்கமாகக் கொண்டுள்ளனர். தமிழர்களில் உயர் சாதியினர், ஆரிய மத வழிபாட்டை பின்பற்றுவதும், அதே நேரம் தாழ்த்தப் பட்ட சாதியினர், ஆதி கால  திராவிட மத மரபை தொடர்ந்தும் பேணி வருவதையும், கருத்தில் கொள்ள வேண்டும். முக்கோண வடிவிலான நடு கல் வைத்து வழிபடுவது, ஆதித் தமிழரின் பண்பாடு என்று தான் தொல்காப்பியமும் கூறுகின்றது. "தமிழ் நாட்டில் பல பகுதிகளில் வெறும் கற்களை நட்டு, அவைகளுக்கு காடன், மாடன், வீரன், சூரன், என்று பெயர் வைத்து வணங்கும் வழக்கத்தை இன்றும் பார்க்கிறோம். இது தமிழர்களின் பரம்பரை வழக்கம்." (தொல்காப்பியத் தமிழர், சாமி சிதம்பரனார்) நாம் நாட்டார் வழிபாடு என்று அழைக்கும், சிறுதெய்வ வழிபாடு, ஒரு காலத்தில் திராவிடர்கள் வாழ்ந்த அரேபியாவிலும் இருந்துள்ளது. ஹீபுரு, அரபு போன்ற செமிடிக் மொழிகளில், அதற்குப் பெயர்  "Bethel".    கிரேக்க மொழியில், "Omphalos".

சிவலிங்கத்தை "ஆண்குறித் தெய்வம்" என்று குறிப்பிடுவது, எப்போதும் சரியானதல்ல. ஆண்குறியை வழிபடும் மத நம்பிக்கை, ஒரு காலத்தில் உலகம் முழுவதும் இருந்துள்ளது. இன்று தம்மை கிறிஸ்தவர்கள் என்று கூறிக்கொள்ளும் ஐரோப்பியர்களும், ஒரு காலத்தில் "ஆண்குறித் தெய்வங்களை" வழிபட்டு வந்தனர். புராதன மதங்களில் செதுக்கப்பட்ட சிற்பங்கள், வரையப்பட்ட ஓவியங்களில் எல்லாம், ஆண் தெய்வங்கள், ஆண் குறியுடன் காட்சி தந்தன. அவற்றை இன்று, இத்தாலிக்கும், கிரேக்கத்திற்கும் சுற்றுலா செல்லும் பயணிகள் நேரில் காணலாம். மனித இனங்கள் காட்டுவாசிகளாக வாழ்ந்த காலங்களில், இயற்கை அழிவுகள், பிற விலங்குகளால் அல்லது போர்களில் கொல்லப்படுதல், போன்ற நெருக்கடிகளுக்கு முகம் கொடுக்க வேண்டியிருந்தது. இந்தப் போராட்டங்களினால், பெருமளவு மனித உயிர்கள் இழக்கப் பட்டன. அந்த இழப்பை ஈடுசெய்வதற்காக,பெருமளவில்  இனப்பெருக்கம் செய்ய வேண்டிய அவசியத்தை உணர்ந்திருந்தனர்.  "பதினாறும் பெற்றுப் பெருவாழ்வு வாழ வேண்டும்" என்ற தமிழ்ப் பழமொழி எல்லாம் அப்பொழுது தான் தோன்றின.

அந்தக் காலத்து மக்கள், பாலியலை ஒரு முக்கியமான சமூகக் கடமையாக் கருதினார்கள். இனப்பெருக்கத்திற்கு காரணமான ஆண்குறி, தெய்வீக சக்தி பொருந்தியது என்று நம்பினார்கள்.  அதனால் தான், ஆண்குறியை கடவுளாக வழிபடும் மத நம்பிக்கைகள் உருவாகின. இது ஒரு வகையில், ஆணாதிக்க சமுதாயம் உருவாவதற்கு வழிவகுத்தது எனலாம். ஐரோப்பாக் கண்டத்தில் முதலாவது வெள்ளையின நாகரீகம் தோன்றிய பல்கேரியாவில், கி.மு. 4000 வருடங்களுக்கு முந்திய புதைகுழிகள் கண்டுபிடிக்கப் பட்டன. அங்கே, ஆண்குறிக்கு தங்கக் கவசம் அணிந்திருந்த மதகுரு ஒருவரின் எலும்புக்கூடும்  கண்டெடுக்கப் பட்டது. பசுபிக் சமுத்திரத் தீவான, பபுவா நியூ கினியாவில், ஆண்குறிக்கு கவசம் அணியும் வழக்கமுடைய பழங்குடி இனம் ஒன்று வாழ்கின்றது. ஆனால், பண்டைய பல்கேரியாவில், சக்தி வாய்ந்த மதத் தலைவர்கள், தமது மேலாண்மையை காட்டிக் கொள்வதற்காக, ஆண்குறிக்கு தங்கக் கவசம் அணிந்து வந்தனர். (100.000 jaar Sex, over liefde, vruchtbaarheid en wellust, Drs. V.T. van Vilsteren)

சிவலிங்க வழிபாடு, இரண்டு வேறுபட்ட பண்பாட்டுக் காலத்தை எடுத்துக் காட்டுகின்றது.  வட இந்தியாவில், சில கோயில்களில் வைக்கப்பட்டிருக்கும் சிவலிங்கம், ஒரு தூண் போன்று நீளமானதாகவும், மேல் முனை ஆண் குறி போன்றும் காணப்படுகின்றது.  இது போன்ற சிவலிங்க வழிபாடு, அப்போது அங்கு தோன்றியிருந்த ஆணாதிக்க சமுதாயத்தை உணர்த்துகின்றது. ஆனால், சிவலிங்கத்திற்கு இன்னொரு அர்த்தமும் உண்டு. "ஆணும், பெண்ணும் சேர்ந்ததே இவ்வுலகம்" என்ற இரட்டைத் தன்மைக் கோட்பாட்டை வலியுறுத்தும் சிவலிங்கங்கள், திராவிட மத நம்பிக்கைக்கு உரியவை. ஆதி கால மனித சமுதாயமும், ஆப்பிரிக்க-திராவிடர்களும் தாய் வழி  சமுதாயத்தை கொண்டிருந்தனர். சமூகத்தில் பெண்ணின் பாத்திரம், சில நேரம் ஆணை விட உயர்ந்து காணப்பட்டது. இந்தியாவில் இந்து மதம் பரவுவதற்கு முன்பிருந்த தாந்திரீக மதம், சிவனையும் பார்வதியையும், "அர்த்த நாரீஸ்வரர்"  என்ற பெயரில் வழிபட்டது. அந்த வழிபாட்டின் தொடர்ச்சி தான், ஆண்குறியும், யோனியும் இணைந்த சிவலிங்கங்கள். 

சிவலிங்கம் அல்லது பெத்தேல் வழிபாட்டுக்கு, இன்னொரு அர்த்தமும் இருந்தது. நடுவில் இருக்கும் பகுதி பூமி அல்லது கோளாகவும், அதை சுற்றியுள்ள பகுதி அண்டவெளியாகவும் கருதப் பட வேண்டும். இந்த நம்பிக்கையானது, "பூமி தட்டையானது"  என்று கூறிய கிறிஸ்தவ இறையியலுக்கு முரணானது. அதாவது, யூத, கிறிஸ்தவ மதங்கள் தோன்றுவதற்கு முன்னமே, பூமி உருண்டை என்பதும், அதை சுற்றி வளிமண்டலம் இருப்பதையும், நமது முன்னோர்கள் அறிந்து வைத்திருந்தனர். (T and O map, http://en.wikipedia.org/wiki/T_and_O_map)  நிச்சயமாக, ஹீப்ரூ, அரபு மொழி பேசிய திராவிடர்களும், அதே காரணத்திற்காக "பேத்தல்" (Bethel ) என்ற கல்லை கடவுளாக வழிபட்டு வந்துள்ளனர். நபெத்தியர்களின் நாகரீகம் சிறப்புற்று விளங்கிய  பேட்ரா (ஜோர்டான்) நகரிலும், அதற்கான சான்றுகள் கண்டெடுக்கப் பட்டன.

ஜெருசலேமில் உள்ள, இயேசு பரலோகம் சென்ற இடத்தில் கட்டப்பட்ட தேவாலயத்தில், ஒரு "பேத்தல் கல்" வைத்துப் பாதுகாக்கப் படுகின்றது.
ஆமாம், விண்கல் இருப்பது, மக்காவில் உள்ள முஸ்லிம்களின் காபாவில் மட்டும் அல்ல. ஜெருசலேமில், கிறிஸ்தவர்களுக்கு புனிதமான தேவாலயத்திலும் அதே விண்கல் உள்ளது.   (In the Church of the Holy Sepulchre in Jerusalem there is also an omphalos. The existence of this stone is based upon the medieval cosmology which saw Jerusalem as the spiritual if not geographical center of the world (see: T and O map). This tradition is likely based on an ancient Jewish tradition that saw Jerusalem as the navel of the world.(Church of the Holy Sepulchre, http://en.wikipedia.org/wiki/Church_of_the_Holy_Sepulchre )

(தொடரும்)



இந்தத் தொடரின் முன்னைய பதிவுகளை வாசிப்பதற்கு:

1.நாம் கறுப்பர்! நமது மொழி தமிழ்! நம் தாயகம் ஆப்பிரிக்கா!
2.பண்டைய எகிப்தின் பத்தினித் தெய்வம்: கண்ணகி அம்மன்
3.சோமாலியர்கள்: தமிழர்களின் மூதாதையர்கள்
4.தமிழர்கள் தொலைத்த ஆப்பிரிக்கக் கடவுள்
5.கோயிலில் பாலியல் தொழில்
6.ஈராக்கில் தோன்றிய தமிழரின் நாகரீகம்
7.ஆடியில் உயிர்த்தெழுந்த, திராவிடர்களின் "கறுப்பு இயேசு!"
8.வேல் முருகன் குடியிருந்த பாக்தாத் நகரம்
9.சிரியாவில் தமிழுக்கு "தம்முழ்" என்றும் பெயர் !
10.கோபுரங்கள் கட்டுவது, ஆண்டவருக்கு விரோதமானது!
11.சிவபெருமான்: ஈராக்கை ஆண்ட கறுப்பின அரசன்? _____________________________________________________________________

 உசாத்துணை நூல்கள்:
1. From Babylon to Timbuktu, by Rudolph R.Windsor
2. Serpent of the Nile, Women and Dance in the Arab World, by Wendy Buonaventura
3. Myths, Dreams and Mysteries: The Encounter Between Contemporary Faiths and Archaic Realities, by Mircea Eliade
4. Myths of Babylonia and Assyria, by Donald A. Mackenzie
5. Mythology, by C. Scott Littleton
6. Babylon, De Echte Stad en de Mythe, by Tom Boily
7. Civilisation One, by Christopher Knight and Alan Butler
8. Persian Myths, by Vesta Sarkhosh Curtis
9. Precolonial Black Africa, by Cheikh Anta Diop
10. Black Arabia & The African Origin of Islam, by Dr. Wesley Muhammad
11. Kusha-Dwipa: The Kushites of Asia, by Dr. Clyde Winters


Web Sites: 
1.Tammuz,http://en.wikipedia.org/wiki/Tammuz_(deity)
2.Dumuzid the Shepherd, http://en.wikipedia.org/wiki/Dumuzid_the_Shepherd
3.Inanna, http://en.wikipedia.org/wiki/Inanna
4.Ishtar, http://en.wikipedia.org/wiki/Ishtar
5.Nimrod, http://en.wikipedia.org/wiki/Nimrod
6.Lingam, http://en.wikipedia.org/wiki/Lingam
7. Omphalos,  http://en.wikipedia.org/wiki/Omphalos