விரும்பிய நேரத்தில் வேலை! இப்படியும் ஒரு நிறுவனம் இருக்கிறது!!

நீங்கள் வேலைக்குச் செல்லும் நிறுவனத்தின் விதி முறைகள் எப்படி இருக்க வேண்டும் என்று நினைக்கிறீர்கள்? 

1. எத்தனை மணிக்கு வேலை தொடங்க வேண்டும்? எத்தனை மணிக்கு    முடிக்க வேண்டும்? எவ்வளவு நேரம் வேலை செய்ய வேண்டும்?

  - அதை நீங்களாகவே தீர்மானித்துக் கொள்ளலாம். வேலைக்கு நடுவில் சிறிது நேரம் ஓய்வெடுக்கலாம். மன நிலை சரியில்லை என்றால் வீட்டில் நிற்கலாம்.

2. என்ன வேலை செய்ய வேண்டும்?

  - உங்களது தகுதி, திறமைக்கு ஏற்ற வேலையை தெரிந்தெடுத்துக் கொள்ளலாம்.

3. எவ்வளவு சம்பளம் வேண்டும்?

- சம்பளத்தின் அளவையும் நீங்களே தீர்மானித்துக் கொள்ளலாம்.

4. எந்த நேரமும் கண்காணிக்கும் மேற்பார்வையாளர்கள் இருப்பார்களா?

- நீங்கள் வேலை செய்கிறீர்களா என்று பார்ப்பதற்கு யாரும் வரப் போவதில்லை. உங்களிடம் ஒப்படைத்த வேலையை பொறுப்புடன் செய்து முடித்துக் கொடுத்தால் போதும்.

5. முகாமையாளர் உங்களுக்கு மேலே அதிகாரம் செலுத்தும் ஒருவராக இருப்பாரா?

- இல்லை. முகாமையாளரை தொழிலாளர்கள் தான் தேர்ந்தெடுக்கிறார்கள். பிடிக்காத முகாமையாளரை வேலையை விட்டு தூக்கும் அதிகாரம் தொழிலாளர்களிடம் உண்டு.

இதை வாசிக்கும் சிலர், ஒரு நகைச்சுவையாகக் கருதி வாய் விட்டுச் சிரிக்கலாம். அப்படி ஒரு நிறுவனம் கனவில் கூட சாத்தியமில்லை என்று நினைக்கலாம். "தொழிலாளர்களுக்கு இந்த அளவு சுதந்திரம் கொடுத்தால், அந்த நிறுவனம் நஷ்டத்தில் இயங்கி திவாலாகும்" என்று, பொருளாதார மேதைகள் கூட பரிகசிக்கலாம்.

நம்பினால் நம்புங்கள். நான் இங்கே எழுதியது எதுவும் கற்பனை அல்ல. மேற்குறிப்பிட்ட விதிகளை கடைப்பிடிக்கும் ஒரு நிறுவனம் (Semco SA) பிரேசில் நாட்டில் இருக்கிறது. அது ஒரு சிறிய நிறுவனம் அல்ல. 250 பேருக்கு மேற்பட்ட பணியாட்களைக் கொண்ட மிகப் பெரிய நிறுவனம். அதன் நிகர இலாபம் வருடாந்தம் அதிகரித்துக் கொண்டே செல்கின்றது. அதன் உரிமையாளர் பிரேசிலில் அதிக செல்வம் படைத்த கோடீஸ்வரர்களில் ஒருவர். அவர் பெயர் : ரிக்கார்டோ செம்லர் (Ricardo Semler)

சுமார் 25 வருடங்களுக்கு முன்னர், ரிக்கார்டோ Semco SA  நிறுவனத்தை, அவரது தந்தையிடம் இருந்து பொறுப்பெடுத்தார். அப்போது அந்த நிறுவனம், நஷ்டத்தில் இயங்கிக் கொண்டிருந்தது. தந்தையிடம் இருந்து நிர்வாகத்தை பொறுப்பெடுத்த ரிக்கார்டோ செய்த முதல் வேலை, மூன்றில் இரண்டு பங்கு முகாமையாளர்களை வீட்டிற்கு அனுப்பியது தான். அதில் பல உறவினர்களும் அடங்குவார்கள். 

செம்கோ நிறுவனம் முழுமையாக மறு சீரமைக்கப் பட்டது. அங்கு வேலை செய்து வந்த தொழிலாளர்கள், மகிழ்ச்சியின்றி கட்டாயத்தின் பேரில் வேலை செய்வதைக் கண்டார். ரிக்கார்டோ, தனது மனதில் தோன்றிய புதிய சிந்தனைகளை நடைமுறைப் படுத்தினார். தொழிலாளர்கள் என்ன வேலை செய்ய வேண்டும் என்று யாரும் வற்புறுத்தப் போவதில்லை. அவர்களுக்கு பூரண சுதந்திரம் வழங்கப் படும். தொழிலகத்தின் நிர்வாகத்தில் பங்கு வகிப்பார்கள். 

தொழிலாளர்கள் அனைவரும் செம்கோ தமது சொந்த நிறுவனம் என்று உணரத் தொடங்கினார்கள். ஒவ்வொரு நாளும் என்ன வேலை செய்ய வேண்டும் என்பதை அவர்களே தீர்மானித்தார்கள். யாரும் அவர்களுக்கு உத்தரவிடவில்லை. யாரும் அவர்களை கண்காணிக்கவில்லை. அவர்களுக்கு விரும்பிய நேரத்தில் வேலை செய்தார்கள். களைத்து விட்டால் சிறிது ஓய்வெடுத்தார்கள். 

தொழிலாளர்கள் தாம் விரும்பிய நேரத்தில் வேலை செய்த போதிலும், அந்த தொழிலகத்தின் உற்பத்தி எந்த விதத்திலும் பாதிக்கப் படவில்லை. மாறாக, அது பல மடங்கு அதிகரித்தது. ஒரு காலத்தில் நஷ்டத்தில் இயங்கிய நிறுவனம், இலாபம் சம்பாதிக்கத் தொடங்கியது. அதனால், நிறுவனத்தில் வேலை செய்யும் அத்தனை பேருக்கும் இலாபத்தில் பங்கு கிடைத்தது. தொழிலாளர்கள் மத்தியில் அது அவர்களது சொந்த நிறுவனம் என்ற உணர்வு ஏற்பட்டது. அவர்கள் மகிழ்ச்சியுடன் மனம் விரும்பி வேலை செய்தார்கள். 

தொழிலாளர்கள் மகிழ்ச்சியுடன் மனம் விரும்பி வேலை செய்தால், அவர்களுக்கும் நன்மை, அதே நேரம் முதலாளிக்கும் நன்மை. ஒரு நிறுவனத்தின் வெற்றியின் இரகசியம் அது தான். இந்த உண்மையை உலகின் பிற பாகங்களில் உள்ள முதலாளிகள் என்றைக்கு உணர்ந்து கொள்ளப் போகிறார்கள்? 

மேலதிக விபரங்களுக்கு:

De kapitale kracht van geluk;
http://tegenlicht.vpro.nl/afleveringen/2012-2013/Semler.html

வீடியோ: 

பிரேசில் நாட்டு தொழிலதிபர் ரிக்கார்டோ செம்லர்  டச்சு தொலைக்காட்சி நிகழ்ச்சி ஒன்றுக்கு (ஆங்கிலத்தில்) வழங்கிய பேட்டி :

பிரிட்டிஷ் - இந்திய தொழிலதிபரின் "தடுப்பு முகாம் நிறுவனம்"

தடுப்பு முகாம்களை லாபம் கொழிக்கும் வர்த்தக ஸ்தாபனமாக நிர்வகிக்கலாமா? இதோ! தடுப்பு முகாம் நடத்தி கோடீஸ்வரரான பிரிட்டனின் சிறிந்த தொழிலதிபர். Businessman of the year?
ராஜேந்திரன் - பிரிட்டனின் வெற்றிகரமான இந்திய வம்சாவழி தொழிலதிபர். ஒரு நாளைக்கு 4000 பவுன்கள் சம்பாதிக்கும் பெருமைக்குரியவர். அவரது வருடாந்த வருமானம் 1.5 மில்லியன் பவுன்கள். Serco என்ற அவுட்சோர்சிங் கம்பெனி அதிபர். அவரது கம்பெனி என்ன செய்கின்றது? ஐக்கிய இராச்சியத்தில் Yarl's Wood , Colnbrook என்ற இரு இடங்களில் தடுப்பு முகாம்களை நிர்வகிக்கின்றது. அந்த தடுப்பு முகாம்களில் அடைபட்டுக் கிடப்பவர்கள், பிரிட்டனில் தஞ்சம் கோரி வந்த அப்பாவி அகதிகள். "பாருக்குள்ளே நல்ல நாடான" பிரிட்டனில் அடைக்கலம் கோரிய குற்றத்திற்காக பெண்களையும், குழந்தைகளையும் அடைத்து வைத்து வருத்தி, கோடிக்கணக்கில் லாபம் சம்பாதிக்கின்றார். சொல்ல மறந்து விட்டேன்... ராஜேந்திரன் ஒரு பெந்தெகொஸ்தே கிறிஸ்தவ சபையை சேர்ந்த விசுவாசமான தேவ ஊழியர். அகதிகளை வருத்தி சேர்த்த லாபப் பணத்தில் ஒரு பகுதியை, ஒரு நல்ல கிறிஸ்தவனாக தனது சபைக்கு கொடுக்கிறார். (கர்த்தருக்கு ஸ்தோத்திரம்)

தொழிலதிபர் ராஜேந்திரனுக்கும், அவர் நடத்தும் சிறைமுகாமில் இருப்பவர்களுக்கும் இடையில் ஒரு ஒற்றுமை உண்டு. இருவரும் வெளிநாட்டில் இருந்து வந்து குடியேறியவர்கள். ராஜேந்திரன் தென் ஆப்பிரிக்காவை சேர்ந்த இந்தியர். அவரது தந்தை ஒரு பிரபலமான வாகன விற்பனையாளர். தென் ஆப்பிரிக்காவில் ஒரு கணக்காளராக பணியாற்றிய ராஜேந்திரன், நெல்சன் மண்டேலா விடுதலையாவதற்கு இரு வருடங்களுக்கு முன்னர் பிரிட்டன் வந்து விட்டார். இன்று அவரது நிறுவனம் ஐரோப்பா, ஆசியா என்று கிளை பரப்பிய போதிலும், தனது தாயகமான ஆப்பிரிக்காவில் எந்த முதலீடும் செய்யவில்லை. தென் ஆப்பிரிக்காவில் முதலாவது ஜனநாயக தேர்தலில் நெல்சன் மண்டேலா தேர்ந்தெடுக்கப் பட்ட பின்னர், அவர் தனது தாய்நாட்டை எட்டியும் பார்க்கவில்லை. அதற்கு காரணம் அவரது குடும்பத்தினரின் கடந்த கால அரசியல் ஈடுபாடு. அன்று தென் ஆப்பிரிக்காவில் இருந்த பெந்தெகொஸ்தே சபைகள் வெள்ளை நிறவெறி (Apartheid) அரசுக்கு ஆதரவளித்து வந்தன. ஆச்சாரமான பெந்தெகொஸ்தே கிறிஸ்தவர்களான ராஜேந்திரன் குடும்பத்தினரும் அத்தகைய அரசியல் பின்னணியைக் கொண்டவர்கள். பொதுவாக அரசியலில் ஆர்வம் இல்லாதது போல காட்டிக் கொள்ளும் பெந்தெகொஸ்தே கிறிஸ்தவர்கள் , இது போன்ற சந்தர்ப்பங்களில் தம்மை வெளிப்படுத்துகின்றார்கள்.

ராஜேந்திரன் உள்ளூர் பெந்தெகொஸ்தே கிறிஸ்தவ சபைக்கு தாராளமாக நன்கொடை வழங்குகிறார். பிற மக்களின் துன்பத்தில் லாபம் சம்பாதித்த ஒருவர் எப்படி கிறிஸ்தவ நன்னெறிகளை கடைப்பிடிக்கிறார்? ராஜேந்திரன் தனது செர்கோ நிறுவனத்தை வீடு மாதிரி கருதுவதாக ஒரு பேட்டியில் தெரிவித்துள்ளார். வருடம் ஒன்றரை மில்லியன் லாபம் சம்பாதிக்கும் ஒருவரால், ஏன் தடுப்பு முகாமில் (மன்னிக்கவும், வீடு) உள்ள வசதிக் குறைபாடுகளை நிவர்த்தி செய்ய முடியவில்லை? அவரது தடுப்பு முகாம்களில் அழுகிய உணவு கொடுப்பது, நிறவெறி வசவுகள், காவலர்கள் அடிப்பது எல்லாம் சாதாரண நிகழ்வுகள். எத்தனையோ தடவை, கொடுமை தாங்க முடியாத அகதிகள் உண்ணாவிரதப் போராட்டத்தில் குதித்துள்ளனர். மனிதர்களின் துன்பத்தில் லாபம் சம்பாதிக்கும் ராஜேந்திரன் கொடுக்கும் வருமானத்தில் பத்து வீதத்தை, மனச்சாட்சியற்ற பெந்தெகொஸ்தே சபை வாங்கிக் கொள்கின்றது. இத்தகைய நற்பண்புகள் தான், ராஜேந்திரனை "இந்த வருடத்திய சிறந்த தொழிலதிபர்" ஆக்குகின்றன. (ஆமென்)

பிரிட்டிஷ் தடுப்புமுகாமில் சிறை வைக்கப் பட்டிருந்த அகதி ஒருவருடனான நேர்காணல்