அகதிகளை வெளியேற்ற போலி விசா தயாரித்த மேற்கத்திய அரசாங்கம்

ஒரு அகதி, போலி பாஸ்போர்ட், போலி விசாவில் பயணம் செய்வது குற்றமாகக் கருதப் படுகின்றது. ஆனால், ஒரு மேற்கத்திய நாட்டு அரசாங்கம், அதே போலி ஆவணங்களை தயாரித்து, ஒரு அகதியை நாடுகடத்துவது குற்றமாகாதா?

மேற்கத்திய நாடுகளில் ஊழல் கிடையாது என்று பெரும்பாலும் நம்பப்படுகின்றது. ஆனால், அவர்கள் மூன்றாமுலக நாடுகளில் நிலவும் ஊழல்களை தமக்கு சாதகமாக பயன்படுத்திக் கொள்கிறார்கள். அண்மையில், நெதர்லாந்தில் அகதித் தஞ்சம் மறுக்கப் பட்டு நாடுகடத்தப் படும் அகதிகள் விஷயத்தில் ஊழல் நடப்பதாக, ஒரு தொலைக்காட்சி நிகழ்ச்சியில் காட்டினார்கள். (http://tvblik.nl/zembla/omkopen-en-uitzetten) நெதர்லாந்து தொலைக்காட்சியில், ZEMBLA எனும் நிகழ்ச்சியை நடத்தும் ஊடகவியலாளர்கள், திருப்பி அனுப்பப்பட்ட அகதிகளின் நாட்டிற்கு சென்று, தகவல்களை சேகரித்துள்ளனர்.

நீண்ட காலமாகவே, தஞ்சம் மறுக்கப்பட்ட அகதிகளை திருப்பி அனுப்புவது, நெதர்லாந்து அரசுக்கு தலையிடியை கொடுக்கும் வேலையாக உள்ளது. ஏனெனில், அகதிகள் தாமாகவே விரும்பி, தாயகம் திரும்பிச் செல்ல சம்மதித்தாலும், அவர்களிடம் தேவையான ஆவணங்கள் இருப்பதில்லை. பாஸ்போர்ட், அடையாள அட்டை எதுவும் இல்லாதபடியால், சம்பந்தப் பட்ட தூதுவராலயத்தில் நாடு திரும்பும் விசா எடுக்க முடியாமல் உள்ளது. உடனடியாக ஒரு புதிய கடவுச்சீட்டை கொடுப்பதற்கு முன்னர், "தம்மிடம் ஒப்படைக்கப் பட்ட அகதி, தமது நாட்டுப் பிரஜை என்பதற்கு என்ன ஆதாரம் ?" என்று கேட்கின்றன. அதற்குப் பின்னரே, தாயகம் திரும்புவதற்கான விசா கொடுத்து ஏற்றுக் கொள்கின்றன. இது வழமையான நடைமுறை. உண்மை நிலவரம் என்னவெனில், திருப்பி அனுப்பும் விசா கொடுப்பதற்கு, பல சமயங்களில், தூதுவரலாயங்கள் ஒத்துழைப்பதில்லை.

ஆப்பிரிக்காவில் உள்ள கினே (Guinee) நாடு, உலகில் மிகவும் வறுமையான நாடுகளில் ஒன்று. அதனால், ஊழலும் மலிந்த நாடு. நெதர்லாந்து அரசு, அகதிகளை திருப்பி அனுப்புவதற்காக, கினே அரசுடன் நெருங்கிய தொடர்பைப் பேணி வருகின்றது. அவர்களுக்கு நிறையப் பணம் கொடுத்து, அகதிகளை திருப்பி அனுப்பத் தேவையான விசாக்களை பெற்றுக் கொள்கின்றது. ஆனால், அதிலும் பல முறைகேடுகள் நடக்கின்றன. கணனியில் வடிவமைத்து, அல்லது போட்டோகொப்பி எடுத்து, உண்மை போன்று தோன்றும் போலிப் பத்திரங்கள் தயாரிக்கப் பட்டுள்ளன. 

கினே தூதுவராலயம், ஒரு அகதியின் விபரங்களை ஆராயாமலே கேட்டவுடன் விசா வழங்குகின்றது. அதாவது, முழுக்க முழுக்க அது ஒரு போலி விசா. நெதர்லாந்து அரசு, கினே தூதுவராலயத்தில் யாரை கொண்டு போய் நிறுத்துகின்றதோ, அவருக்கு உடனே கினே செல்லும் விசா வழங்கப் படுகின்றது. அந்த அகதி, உண்மையில் வேறொரு ஆப்பிரிக்க நாட்டவராக இருந்தாலும், கினே யுக்கு நாடுகடத்தப் படும் அபாயமும் உள்ளது. நெதர்லாந்து, பெல்ஜியத்தில் உள்ள, கினே தூதுவராலயம், எதையும் ஆராயாமல் விசா வழங்குவதாக கிடைத்த முறைப்பாடுகளை விசாரிப்பதற்காக, ZEMBLA ஊடகவியலாளர்கள் கினே சென்றனர்.

ZEMBLA,  தீர விசாரித்து ஆராயும் ஊடகவியலை கடைப்பிடிக்கின்றது. அதன் ஊடகவியலாளர்கள், ஒரு விடயத்தை தேடி, துப்புத் துலக்கி, உண்மையை ஆராய்ந்து, அதனை உலகிற்கு அறிவித்து வருகின்றனர். ஏற்கனவே, ZEMBLA தான், அயான் ஹிர்சி அலி என்ற சோமாலிய இஸ்லாமிய எதிர்ப்பு அரசியல்வாதியின் வண்டவாளங்களை வெளிக் கொணர்ந்தது.

கினே தலைநகர் கொனாகிரிக்கு சென்ற ZEMBLA குழுவினர், விசா வழங்கிய "உள்துறை அமைச்சு" அதிகாரிகளை, அமைச்சரை சந்தித்துப் பேச விரும்பினார்கள். என்ன ஆச்சரியம், கினேயில் தற்போது "உள்துறை அமைச்சு" என்ற பெயரில் எந்தவொரு அமைச்சும் கிடையாது! அது வேறு பெயரில் இயங்குகின்றது. அனேகமாக, இருபது வருடங்களுக்கு முன்பிருந்த அமைச்சு ஒன்றின் பெயரில், யாரோ போலி ஆவணங்களை வழங்கிக் கொண்டிருக்கிறார்கள். அது சட்டவிரோதமானது. ஆனால், நெதர்லாந்து அரசுக்கு அதைப் பற்றிய கவலை எதுவும் கிடையாது. விசா ஆவணம் உண்மையா, போலியா என்று ஆராய வேண்டிய அவசியம் அதற்குக் கிடையாது. தனது நாட்டை விட்டு ஒரு அகதியை வெளியேற்றி விட்டால் போதுமானது என்று, நெதர்லாந்து அரசாங்கம் நிம்மதிப் பெருமூச்சு விடும்.

தாயகம் திரும்பும்/ திருப்பி அனுப்பப் படும் அகதிகளுக்கு, இல்லாத ஒரு அமைச்சின் பெயரால் போலி கடவுச்சீட்டு, போலி விசா வழங்கப் படுகின்றது.   நெதர்லாந்தில் இருந்து திருப்பி அனுப்பப் படும் அகதிகளின் விசா ஆவணத்தில் காணப்பட்ட, அமைச்சு சீல் போலியானது. விசா பத்திரத்தில் கையொப்பமிட்ட அதிகாரியை பற்றி விசாரித்த பொழுது, பல திடுக்கிடும் தகவல்கள் வெளியாகின. அந்த அதிகாரி, நெதர்லாந்து அரசுடனான தொடர்பாடலுக்காக நியமிக்கப் பட்டதாக, அமைச்சர் கூறினார்.

விசா பத்திரத்தில் கையொப்பமிட்டுள்ள அதிகாரிக்கு, அதற்கான அதிகாரம் கிடையாது. "ஆவணத்தில் உள்ள அமைச்சின் பெயர், சீல், அனைத்தும் போலியானது என்று உறுதிப் படுத்துவதாகவும், சம்பந்தப் பட்ட அதிகாரியை நெதர்லாந்து அரசு பயன்படுத்திக் கொள்வதாகவும்..." அமைச்சர் தெரிவித்தார். ஆயினும், இந்த மோசடியில் அனைவருக்கும் பங்கிருக்கலாம், அந்த அமைச்சருக்கு எல்லாம் தெரிந்திருக்கலாம். இந்த வீடியோ ஒளிபரப்பப் பட்ட பின்னர், "அதிலே கூறப்பட்ட தகவல்கள் உண்மைக்கு மாறானவை..." என்று நெதர்லாந்து அரசு ஒரு அறிக்கை விட்டிருக்கிறது. (Uitzending Zembla over terugkerende Guineeërs) 

நெதர்லாந்தில் இருந்து திருப்பி அனுப்பப் பட்ட கோனே எனும் முன்னாள் அகதியை, ஊடகவியலாளர்கள் தேடிச் சென்று சந்தித்தனர். அந்த அகதியின் மனைவியும், நான்கு வயது மகனும் இன்னமும் நெதர்லாந்தில் வசிக்கின்றனர். நான்கு வயது குழந்தை, தந்தையை காணாமல் எல்லா இடங்களிலும் தேடிக் கொண்டிருப்பதாக, தாய் கூறி வருத்தப் பட்டார். அதை விட, திருப்பி அனுப்பப் பட்ட அகதி, கண் பார்வைக் குறைபாடு கொண்டவர். அவரது சிகிச்சைக்கு தேவையான மருந்துகள் கினேயில் கிடைப்பதில்லை. அவரிடம் கையில் பணமும் இல்லை. தற்போது வசிக்கும், கினே தலைநகர் கொனாகிரியில் தெரிந்தவர் யாரும் இல்லை.

தனக்குத் தந்த விசா போலியானது என்பதை, திருப்பி அனுப்பப் பட்ட கோனே எனும் அகதியும் உறுதிப் படுத்துகின்றார். நெதர்லாந்தில் இருந்து, கினே விமான நிலையத்தில் வந்திறங்கிய பொழுதே, பிரச்சினைகள் ஆரம்பமாகி விட்டன. அவரது கையில் இருந்த விசா, பெல்ஜியத்தில் உள்ள கினே தூதுவராலயத்தால் வழங்கப் பட்டிருந்தது. (ZEMBLA தொடர்பு கொண்ட பொழுது, தாங்கள் அப்படி ஒரு விசா கொடுக்கவில்லை என்று தூதரக அதிகாரிகள் மறுத்திருந்தனர்.)

நெதர்லாந்தில் இருந்து திருப்பி அனுப்பப் பட்ட கோனே என்ற அகதியுடன், ஒரு டச்சு இராணுவ- பொலிஸ் வீரர் பயணம் முழுவதும் கூடவே சென்றுள்ளார். கொனாகிரி விமான நிலையத்தில் இறக்கி விட்டு திரும்பியுள்ளார். இவ்வளவும் இருந்த போதிலும், விமான நிலையத்தில் இருந்த குடிவரவு அதிகாரிகள், அந்த அகதியை நாட்டிற்குள் விட மறுத்தனர். போலி விசாவில் வந்திறங்கியதாக காரணத்தைக் கூறி, அவரை அங்கேயே தடுத்து வைக்க முயன்றுள்ளனர். இறுதியில், நூறு யூரோ லஞ்சமாக வாங்கிக் கொண்டு தான் வெளியே விட்டுள்ளனர். (கினே நாட்டில், அது ஒருவரின் ஒரு மாத சம்பளம்.)

சாதாரண அகதிகள், போலி விசாவில் ஒரு நாட்டிற்குள் நுழைய முயன்றால், அதனை குற்றமாகக் கருதி தண்டனை கொடுக்கிறார்கள். போலி விசா தயாரித்துக் கொடுக்கும் கிரிமினல்களுக்கு கடுமையான சிறைத் தண்டனை வழங்குகிறார்கள். ஆனால், அதே போலி விசாவை ஒரு அரசாங்கம் தயாரித்தால், அது குற்றமாகாதா? அதற்குப் பொறுப்பானவர்கள் யாரும் தண்டிக்கப் படுவதில்லை.

ZEMBLA நிகழ்ச்சியின் வீடியோவை கீழே உள்ள இணைப்புகளில் முழுமையாகப் பார்வையிடலாம்:

Omkopen en uitzetten

http://dewerelddraaitdoor.vara.nl/media/313660

http://tvblik.nl/zembla/omkopen-en-uitzetten

புகலிடத்தில் அகதிகளை வேவு பார்க்கும் அரசுகள்

உங்களது பெயர் "பயங்கரவாதிகள் பட்டியலில்" இடம்பெற்றுள்ளதா? [பகுதி - 3]

நெதர்லாந்தில், ஒரு காட்டுப்பகுதியில், கைவிடப்பட்ட "நேட்டோ" இராணுவமுகாம் ஒன்று, இப்போது அகதிமுகாமாக இயங்கிக் கொண்டிருந்தது. சுமார் 15 வருடங்களுக்கு முன்பு, உலகம் மாறிக் கொண்டிருந்த காலம் அது. அந்த அகதி முகாமில் வசித்த அகதிகளில், என்பது வீதமானவர்கள் இஸ்லாமிய நாடுகளைச் சேர்ந்தவர்கள். ஆப்கானிஸ்தான், ஈராக், ஈரான், சோமாலியா, பொஸ்னியா ஆகிய நாடுகளைச் சேர்ந்த, பல்வேறு மொழிகளை பேசும் மக்கள், ஆனால் எல்லோரையும் இஸ்லாம் என்ற மதம் இணைத்திருந்தது.

அல் கைதா பற்றியோ, அல்லது இஸ்லாமிய அரசியல் பற்றியோ, அன்று வெளியுலகில் அதிகமானோர் அறிந்திருக்கவில்லை. அதனால் அந்த அகதிகளில் பலர், சர்வதேச இஸ்லாமிய சகோதரத்துவம் பற்றி கொடுத்த விளக்கங்கள் பல எனக்கு புதுமையாக இருந்தன. அவர்களில் எல்லோரும் இஸ்லாமியவாதிகள் அல்ல. குறிப்பாக ஆப்கானிஸ்தானில் இருந்து வந்தவர்களில் (முன்னாள்) மார்க்சிஸ்டுகள் இருந்தனர். பொஸ்னியாவில் இருந்து வந்தவர்களுக்கு இஸ்லாமைப் பற்றி நான்கு வசனங்களுக்கு மேல் எதுவும் சொல்லத் தெரிந்திருக்கவில்லை. அதேநேரம் ஈரானில் இருந்து வந்த பலர், மேற்கத்திய கலாச்சார மோகம் கொண்டவர்களாக, மதச்சார்பற்றவர்களாக காட்டிக் கொள்ள முனைந்தனர். எது எப்படி இருப்பினும், அவர்களில் பெரும்பாலானவர்களுக்கு, நெதர்லாந்து அரசாங்கம் அகதி அந்தஸ்து வழங்கியது. இவ்வாறு ஒரு சில வருடங்களில் மட்டும் இலட்சக்கணக்கான பன்னாட்டு முஸ்லிம்கள் இந்த நாட்டில் தங்க அனுமதிக்கப்பட்டார்கள்.

11 செப்டம்பர் 2001 க்கு பிறகு உலகம் தலைகீழாக மாறியது. எந்தப் புற்றுக்குள் எந்த தீவிரவாதி இருக்கிறான் என்று, ஊடகங்களும் அரசாங்கங்களும் சல்லடை போட்டு தேடிக்கொண்டிருந்தன. என்ன ஆச்சரியம்? ஒரு காலத்தில் இஸ்லாமிய நாடுகளில் இருந்து வந்தவர்க்கெல்லாம், தங்க அனுமதித்த அதே அரசு, இப்போது சந்தேகக்கண் கொண்டு பார்த்தது. அல் கைதா, தாலிபான் உறுப்பினர்கள் என்று சிலரை, ஊடகங்கள் புலனாய்வு செய்து வெளியிட்டன. அதே நேரம், ஒரு சிலர் முன்னாள் அரச, இராணுவ அதிகாரிகள் என்றும், கைதிகளை சித்திரவதை செய்தவர்கள் என்றும், அவர்களை தண்டிக்க வேண்டும் என்றும், சில மனித உரிமை அமைப்புகள் குட்டையைக் கிளறி விட்டன. இவ்வளவு ஆர்ப்பாட்டங்களுக்கு மத்தியிலும், நெதர்லாந்து அரசாங்கம் அப்பாவி போல முகத்தை வைத்துக் கொண்டது.

"அடடா, இந்த இஸ்லாமியத் தீவிரவாதிகள், அப்பாவி வெள்ளையனை ஏமாற்றி விட்டார்களா?" என்று உடனே ஒரு முடிவுக்கு வந்து விடாதீர்கள். மேற்குலக நாடுகளின் "அகதிகள் அரசியலைப்" புரிந்து கொண்டவர்களுக்கு, வெள்ளையன் குடுமி சும்மா ஆடாது என்ற விடயம் தெரியும். மேற்கு ஐரோப்பாவில், அமெரிக்க அரசுடன் நெருங்கிய உறவைப் பேணி வரும் நெதர்லாந்து அரசாங்கம் அப்போதிருந்தே அகதிகளை ஏற்றுக்கொள்ளும் காருண்யவானாக காட்டி வந்துள்ளது. பொஸ்னியா சென்று பேரூந்து வண்டிகளில் முஸ்லீம் அகதிகளை ஏற்றிக்கொண்டு வந்தார்கள். இந்த சம்பவம் நடப்பதற்கு, ஓரிரு மாதங்களுக்கு முன்னர், அகதிகளுக்கு இரங்கிய அதே அரசின் சமாதானப் படையை சேர்ந்த அதிகாரி, செர்பிய படைகள் முஸ்லீம்களை கொன்று போட அனுமதித்த விடயம் வெளியே தெரிய வர சில காலம் எடுத்தது.

இன்னொரு விதமாக சொன்னால், அகதிகள் உருவாக காரணமானவர்களே, அவர்களை ஏற்றுக் கொண்டனர், பொஸ்னிய யுத்தம் முடிந்த பிறகு அனுப்பியும் வைத்தனர். இதே கதை தான் ஈராக்கிலும், ஆப்கானிஸ்தானிலும் நடந்தது. இந்த நாடுகளைச் சேர்ந்த கைதிகளிடம் இருந்து, உள்நாட்டு இராணுவ/அரசியல்/பொருளாதார இரகசியங்களை, விலை மதிக்க முடியாத தகவல்களைப் பெற்றுக் கொண்டனர். அவற்றில் எல்லாமே சரியானவை அல்ல என்பது வேறு விடயம். உதாரணத்திற்கு, சதாம் அணுகுண்டு வைத்திருந்த கதை, தமது தஞ்சக் கோரிக்கையை ஏற்றுக் கொள்ள வைக்க, சில ஈராக்கிய அகதிகள் கூறிய பொய் என்பது பின்னர் தெரிய வந்தது. அதே போல, இஸ்லாமிய எதிர்ப்பு போராளியாக காட்டிக் கொண்ட சோமாலிய "வீரப் பெண்மணி" ஹிர்சி அலி, புகழ் தேடி இட்டுக் கட்டிய கதைகளை, பின்னர் தொலைக்காட்சி நிகழ்ச்சி ஒன்று புட்டுப் புட்டு வைத்தது.

வருகிற அகதிகள் எல்லாம், தான் குறிப்பிட்ட ஒரு அரசாங்கத்தில், அல்லது இயக்கத்தில் பெரிய பதவியில் இருந்ததாக கதை விடுவார்கள் என்பது, அவர்களை விசாரிக்கும் அதிகாரிகளுக்கு தெரியாத சங்கதியல்ல. உண்மையிலேயே அப்படியான நிலையில் இருந்தவர்களைக் கண்டுபிடிப்பதற்கு அதிகாரிகள் பயிற்றுவிக்கப்பட்டுள்ளனர். குறிப்பிட்ட நாட்டை சேர்ந்த அகதியை விசாரிக்கும், சம்பந்தப்பட்ட அதிகாரி அந்த நாட்டைப் பற்றி தன் நாட்டு வெளிவிவகார அமைச்சு தொகுத்த அறிக்கையை வாசித்திருப்பார். (சில நேரம் விசாரணை நடக்கும் இடத்திலும் இந்த அறிக்கையை வைத்திருப்பார்). அதனால் விசாரிக்கப்படும் அகதி, வழக்கமாக தெரிந்த நபர்களை அல்லது இடங்களைப் பற்றி அதிகமாக தெரிவிக்கும் போது, அந்த அகதியிடம் இன்னும் கறக்கலாம் என நினைத்துக் கொள்வர். கவனிக்கவும், முதலில் விசாரிப்பவர் எப்போதும் குடிவரவு அமைச்சில் வேலை செய்யும் சாதாரண அதிகாரி தான். ஆனால், குறிப்பிட்ட அகதியிடம் இருந்து இன்னும் நிறைய தகவலைப் பெறுவதற்காக, இன்னொரு விரிவான விசாரணைக்கு அழைக்கப்படுவார். அந்த விசாரணையை செய்வது அனேகமாக புலனாய்வுத்துறையை சேர்ந்த அதிகாரியாக இருப்பார். அகதிகளிடம் இருந்து பெற்றுக்கொள்ளும் தகவல்களை பிறகு என்ன செய்வார்கள் என்பது யாருக்கும் இதுவரை தெரியாது. தஞ்சம் கோரிய அகதியின் சொந்த நாட்டு அரசிற்கு அறிவிக்க மாட்டோம் என்று சத்தியம் செய்த போதிலும்.... தகவல்கள் பரிமாறப்படுவதாக சில அகதிகளுக்கு உதவும் நிறுவனங்கள் அஞ்சுகின்றன.

மேற்குலக நாட்டு அரச புலனாய்வுப்பிரிவு, சில அகதிகளை தமக்கு வேலை செய்யுமாறு கேட்ட சம்பவங்கள் பல உள்ளன. அவ்வாறு ஒத்துக் கொள்ளும் போது, அவரது நாட்டை சேர்ந்தவர்களை வேவு பார்த்து சொல்லுமாறு பணிக்கப்படுவர். அந்த சேவைக்கு பணம் வழங்கப்படலாம், அல்லது அந்த அகதிக்கு அத்தியாவசியமாக தேவைப்படும் அகதி அந்தஸ்தோ, அல்லது பிரசா உரிமையோ வழங்கப்படலாம். வேவு பார்க்க மறுப்பவர்களின் தஞ்சக் கோரிக்கை நிராகரிக்கப்பட்டு நாட்டிற்கு திருப்பி அனுப்பப் போவதாக பயமுறுத்தப்பட்ட சம்பவங்களும் நடந்துள்ளன. ஆகவே எதுவும் சாத்தியமே.

இனி மீண்டும் இஸ்லாமிய நாடுகளின் அகதிகளைப் பற்றிய விடயத்திற்கு வருவோம். பெருந்தொகையாக இவர்களுக்கு அகதி அந்தஸ்து வழங்கப்பட்டது ஏன் என்ற புதிருக்கான பதில் சில வருடங்களில் தெரிய வந்தது. முதலில் சர்வதேச (வாசிக்கவும்: அமெரிக்க) தலையீட்டினால், பொஸ்னியாவில் யுத்தம் நின்று, சமாதானம் ஏற்பட்டது. போரினால் அழிவுற்று எதிர்காலம் கேள்விக்குறியாக இருந்த நாட்டிற்கு திரும்பிச் செல்லுமாறு அகதிகள் வற்புறுத்தப்பட்டனர். மீள்குடியேற்றத்திற்கு சிறு தொகைப் பணம் கொடுப்பதாக வாக்களித்தனர். புகலிடம் கோரிய நாட்டிலேயே தங்குவோம் என பிடிவாதம் பிடித்தவர்களுக்கு, அனைத்து சட்ட வழிகளும் அடைக்கப்பட்டு நிர்க்கதியான நிலைக்கு தள்ளப்பட்டனர்.

ஆப்கானிஸ்தானிலும், ஈராக்கிலும் என்ன நடந்தது என்பதை நான் இங்கே அதிகமாக விபரிக்க தேவையில்லை. அமெரிக்க இராணுவக் கட்டுப்பாட்டின் கீழ் வந்த அந்த நாடுகளில், மொழிபெயர்ப்பாளராகவும், பிற அரச கருமங்கள் ஆற்றுவதற்கான ஊழியர்களாக, மேற்குலகில் தஞ்சம் கோரியிருந்த முன்னாள் அகதிகளின் சேவை பயன்படுத்தப்பட்டது. ஆனால் அந்த கடமை அவ்வளவு இலகுவானதாக இருக்கவில்லை. அந்நிய ஆக்கிரமிப்பை எதிர்த்துப் போராடும் இயக்கங்கள், அவர்களை துரோகிகளாக பார்த்தன. சில நேரம் தாக்குதல்களில் கொள்ளப்படலாம் என்ற ஆபத்திற்கு மத்தியில் தான் அவர்கள் பணி புரிய வேண்டியுள்ளது. உண்மையில் சில பேர் தாமாக விரும்பிப் போயிருக்கலாம். இருப்பினும் குறிப்பிட்ட தொகையினருக்கு வேறு வழி இருக்கவில்லை. ஒரு பக்கம் தஞ்சம் கோரிய நாட்டில் விரட்டுகிறார்கள், மறுபக்கம் சொந்த நாட்டில் கொல்கிறார்கள். எங்கே போவது?

-- தொடரும் --

இது தொடர்பான முன்னைய பதிவுகள்:
Part 2: நிலவுக்கு ஒளித்தாலும் பரதேசத்திலும் பயங்கரவாதி
Part 1: உங்களது பெயர் "பயங்கரவாதிகள் பட்டியலில்" இடம்பெற்றுள்ளதா?